Zachodnija viatry prynieśli ŭ Biełaruś pieršyja pyłki-alerhieny
U Biełarusi pačynajecca pieršy ŭ hetym siezonie pieryjad aktyŭnaha raspaŭsiudžvańnia pyłku, jaki moža vyklikać alerhiju. Pavodle nazirańniaŭ, zachodnija viatry prynieśli ŭ krainu pyłok raślin, i najbolš składanaja situacyja ciapier u Hrodzienskaj i Bresckaj abłaściach, paviedamiła teleradyjokampanija «Hrodna».
Zdymak ilustracyjny. Fota: freepik.com
Hałoŭnaj pryčynaj viasnovych alerhij źjaŭlajecca biaroza, a ŭ Hrodnie da jaje dałučyłasia i mahnolija. Drevy pačynajuć masava ćviści, tamu kolkaść pyłku ŭ pavietry moža chutka ŭzraści da vysokaha ŭzroŭniu.
Miedyki tłumačać, što palinoz — heta siezonnaja alerhija, kali imunnaja sistema reahuje na pyłok jak na niešta niebiaśpiečnaje. U vyniku ŭ čałavieka źjaŭlajucca simptomy: ślozy, nasmark, čchańnie i kašal.
Śpiecyjalisty papiaredžvajuć, što nie varta ihnaravać takija prajavy, bo jany mohuć pierajści ŭ bolš surjoznyja chvaroby, naprykład, chraničny alerhičny rynit abo astmu.
Dla vyjaŭleńnia alerhii vykarystoŭvajuć śpiecyjalnyja testy abo analiz kryvi. Kab palehčyć stan, daktary rajać prymać antyhistaminnyja preparaty, ale tolki paśla kansultacyi sa śpiecyjalistam.
Taksama adznačajecca, što ŭ červieni alerhiju buduć čaściej vyklikać złakavyja travy kštałtu cimafiejeŭki, a naprykancy leta — inšyja raśliny, naprykład pałyn i lebiada.
Čytajcie taksama:
Čamu pry ŭkusie klašča biessensoŭna adrazu zdavać analiz kryvi
Na zachadzie Biełarusi aktyvizavalisia viasnovyja alerhieny
Kolki možna źjeści mandarynak, kab nie było niepryjemnych nastupstvaŭ