Prapahandystka Šybkoŭskaja raskazała pra svaje pakuty — jak «kamaryny ŭkus» akazaŭsia chvarobaj Łajma

Usio pačałosia ŭ adzin ź letnich vychadnych. Šybkoŭskaja ź jaje maładym čałaviekam adpačyvali kala vadajoma. Potym na dačy jana vyrašyła trochi pakapacca ŭ aharodzie. 

I raptam adčuła na nazie lohki śvierb — jak byccam ukusiła moška. Samu mošku jana nie bačyła, prosta źjaviłasia maleńkaja plamka, padobnaja na kamaryny ŭkus. 

Na nastupny dzień ukus staŭ bolšym. Ale i heta žančynu nie naściarožyła, jana była ŭpeŭnienaja, što praź dzień-dva ŭsio projdzie.

Ale paśla vychodnych ukus raspuch. Jana pajšła ŭ miedpunkt.

Miedsiastra apracavała ŭkus maźziu z antybijotykam, nakłała paviazku i zahadała pryjści na nastupny dzień, kali stanie horš. 

Na nastupny dzień plama stała jašče bolšaj — ružovaje ŭtvareńnie nie tolki rasło, ale i źmianiała koler. Žančyna napisała znajomamu dermatołahu.

Kali jana pryjšła na pryjom da dermatołaha, plama ŭžo vyhladała žachliva. Jana pavialičvałasia kožny dzień. Siaredzina stała ciamnieć, z ružovaj pieratvarajučysia ŭ fijaletavuju.

Doktar uvažliva ahledzieŭ nahu i niečakana spytaŭ:

— A barščeŭnik u vas tam raście? Moža ty nie zaŭvažyła i nastupiła?

Jon patłumačyŭ, što kropla soku barščeŭniku na soncy moža vyklikać mocny apiok z puchirami. Barščeŭnik na pryrodzie ros, tamu viersija hučała łahična. Šybkoŭskaj pryznačyli pantenoł i stroha zahadali chavać nahu ad sonca.

Jana tak i rabiła. Chadziła pa haračym letnim horadzie z paviazkaj na nazie. Ale lepš nie stanaviłasia. Da viečara źjaŭlaŭsia śvierb, plama praciahvała raści.

Praz tydzień stała zrazumieła: lačeńnie nie dapamahaje. I toj znajomy dermatołah ščyra pryznaŭsia, što nie  viedaje, što heta. Lepš schadzić jašče da adnaho śpiecyjalista.

Tady jana pajšła ŭ pryvatny miedycynski centr. Maładaja lekarka ŭvažliva ahledzieła nahu i vysłuchała historyju.

— Zaraz źjaŭlajucca novyja vidy mošak, klimat mianiajecca, — skazała jana. — Mahčyma, heta alerhičnaja reakcyja na ŭkus.

Dyjahnaz pastavili — vaskulit. Doktarka pryznačyła ŭkoły pradnizałonu i maź, jakuju zvyčajna vykarystoŭvajuć pry psaryjazie. Ukoły treba było rabić terminova. Ale ŭ miedcentry ich u toj dzień nie stavili. Tady doktarka skazała pajechać u lubuju balnicu pablizu — tam abaviazanyja zrabić ukoł biez špitalizacyi. 

U pryjomnym pakoi balnicy, ubačyŭšy nahu, joj sapraŭdy zrabili pieršy ŭkoł i adpuścili.

Litaralna na nastupny dzień plama stała bladnieć. Śvierb źnikaŭ. Naha vyhladała ŭsio lepš. Zdavałasia, historyja skončyłasia. Ale jana tolki pačynałasia.

Praź miesiac usio całkam zahaiłasia. Nastaŭ čas vykarystoŭvać druhi krem, jakim treba było praciahnuć lačeńnie — zvyčajna jon vykarystoŭvajecca pry ŭzmocnienaj pihmientacyi skury. Ale žančyna vyrašyła, što heta ŭžo lišniaje — plama ž źnikła.

Ale praz paru dzion u tym ža miescy znoŭ źjaviŭsia śvierb. A potym — i znajomaja čyrvonaja plama, a pobač jašče adna.

Jana znoŭ mazała jaje kremam, taja źnikała. Pierastaje mazać — źjaŭlajecca znoŭ. U panicy zapisałasia da lekarki znoŭ. Taja ździviłasia nie mienš.

I raptam zadała pytańnie, jakoje raniej hučała tolki mimachodź:

— Vy ŭpeŭnienyja, što heta nie klešč?

Doktarka patłumačyła: inficyravany iksodavy klešč moh ukusić i adpaści sam. Jana adpraviła zdavać analiz kryvi, kab vyklučyć chvarobu Łajma (kleščavy barelijoz).

Pavodle słoŭ dermatołaha, raniej čym praź miesiac analiz nie mieła sensu rabić, bo ŭ hety pieryjad jon by pakazaŭ iłžyvaadmoŭny vynik.

Padazreńnie na chvarobu Łajma paćvierdziłasia. Kali b analiz byŭ admoŭnym, nastupny krok byŭ by — lačeńnie vaskulitu ŭ reŭmatołaha. 

Na pryjomie, kaža Šybkoŭskaja, vielmi spatrebilisia fatahrafii, zroblenyja da i paśla, pakolki plama na nazie ŭ hety momant była ledź zaŭvažnaj.

Akazałasia, što ŭ jaje vielmi nietypovaja karcina simptomaŭ, tamu dermatołah i infiekcyjanist paprasili sfatahrafavać nahu i jašče niekalki fota dasłać im dla asabistaha archiva.

Sprava ŭ tym, što zvyčajna plama paśla klašča kruhłaja, ź jarka vyražanym konturam i śvietłaja ŭnutry. A ŭ jaje ciomnaja, dy jašče i z drobnymi puchirami, jak pry krapiŭnicy. Takoje redka sustrakajecca na praktycy.

Była jašče adna składanaść: pakolki klaščy žančynu ŭžo kusali hadoŭ 10 tamu (ale biez takoj burnaj reakcyi arhanizma), jaje adpravili na pašyrany analiz, kab vyśvietlić, ci nie moža heta być reštkavaj źjavaj. Raptam jana daŭno zachvareła, ale chraničnaja chvaroba praciakała da niejkaha momantu bieśsimptomna? Ad hetaha zaležaŭ pratakoł lačeńnia, praciahłaść antybijotykaterapii.

Daśledavańnie paćvierdziła, što faza chvaroby vostraja. Dalej žančyna amal miesiac piła impartnyja antybijotyki.

«Smak lekaŭ akazaŭsia takim ahidnym, što pieršuju tabletku ja ledź nie vyplunuła prama ŭ klinicy. Akazałasia, jaje treba było rastvarać u vadzie, a ja paśpieła jaje prahłynuć, tak mnie chaciełasia chutčej pačać lačeńnie. Ahida da tabletak i młosnaść — usio heta supravadžała moj šlach da vylačeńnia. Ale pryjšłosia ciarpieć: chvarobu Łajma nielha zapuskać. Pastupova ŭsio skončyłasia», — raspaviadaje žančyna.

Šybkoŭskaja davodzić, što hetaja historyja navučyła jaje «hałoŭnamu: časam samy biaskryŭdny ŭkus moža akazacca zusim nie tym, čym zdajecca».

Tamu, raić jana, kali letam vy raptam zaŭvažyli dziŭnuju plamu na skury — nie adkładajcie vizit da lekara. Klaščy siońnia sustrakajucca navat tam, dzie ich raniej amal nie było.

• 0
• 0
• 0
• 0
• 0
• 0
• 0
• 0