U Homieli na rekanstrukcyju kanfierenc-zały miascovaj milicyi patraciać miljon dalaraŭ

Upraŭleńnie ŭnutranych spraŭ Homielskaha abłvykankama abviaściła bujny tendar na sumu 2 miljony 425 tysiač 614 rubloŭ, zaŭvažyła vydańnie «Fłahštok».

Takija srodki abłasnaja milicyja nakiruje na kamplekt technałahičnaha abstalavańnia pa abjekcie budaŭnictva: «Rekanstrukcyja budynka śpiecyjalizavanaha dla orhanaŭ dziaržaŭnaha kiravańnia, abarony, dziaržaŭnaj biaśpieki, unutranych spraŭ pa adrasie Homiel, vuł. Kamunaraŭ, 3 u pamiaškańniach kanfierenc-zały».

Siudy ŭvachodziać kompleksy abstalavańnia aŭdyjavizualnaj sistemy, pastanovačnaha aśviatleńnia, abstalavańnia sistemy videapakazu.

Da hetaha UUS šukała padradnuju arhanizacyju dla vykanańnia budaŭniča-mantažnych, puskanaładačnych rabot, mantažu abstalavańnia pa hetym ža samym abjekcie. Suma hetych rabot składała amal 1,1 miljona rubloŭ.

U vyniku na rekanstrukcyju kanfierenc-zały homielskaha UUS pojdzie minimum 3,5 miljona rubloŭ, heta značyć bolš za 1 miljon dalaraŭ. U zakupcy ŭdakładniajecca, što raboty buduć apłačanyja z ułasnych srodkaŭ.

U dakumientacyi tendara havorycca pra toje, što prajektam praduhledžana raźmiaščeńnie pasadačnych miescaŭ pa pryncypie kinateatra, ustalavańnie novych padłoh, ścien, stoli, sceny.

Jak paviedamlaŭ «Fłahštok» raniej, u Homielskaj vobłaści na ramont i rekanstrukcyju rajadździełaŭ milicyi ŭžo patracili miljony dalaraŭ.

Kamientary da artykuła