Tramp zajaviŭ, što karabli VMS ZŠA zajšli ŭ Armuzski praliŭ i «ačyščajuć» jaho

Karabli VMS ZŠA ŭpieršyniu ad pačatku vajny ź Iranam zajšli ŭ Armuzski praliŭ, zajaviŭ amierykanski prezident Donald Tramp. Pra heta paviedamlaje Sky News.

Donald Tramp. Fota: AP / Alex Brandon

U 14:00 pastupiła paviedamleńnie, u jakim śćviardžałasia, što karabli VMS ZŠA siońnia zajšli ŭ Armuzski praliŭ. 

«My zaraz ačyščajem Armuzski praliŭ», — zajaviŭ Donald Tramp.

Pavodle jaho słoŭ, amierykanskija vajskoŭcy pačali ačyščać maršrut, usie iranskija karabli-minaŭkładčyki byli patoplenyja.

«Zaraz my pačynajem praces raźminiravańnia Armuzskaha praliva jak pasłuhu krainam usiaho śvietu, uklučajučy Kitaj, Japoniju, Paŭdniovuju Kareju, Francyju, Hiermaniju i mnohija inšyja», — napisaŭ lidar ZŠA ŭ sacsietcy Truth Social.

«Nievierahodna, ale ŭ ich niama ni śmiełaści, ni voli, kab vykanać hetuju pracu samastojna. Adnak, što vielmi cikava, pustyja naftavozy z mnohich krain nakiroŭvajucca ŭ ZŠA, kab zahruzicca naftaj», — dadaŭ jon.

Prezident ZŠA taksama adznačyŭ, što iranskija minnyja zaharadžalnyja karabli «lažać na dnie mora».

Zajaŭlajučy, što ŭsie pavietranyja i marskija siły iranskaj armii asłablenyja, a jaje rakiety i drony «ŭ asnoŭnym źniščanyja», Tramp adznačyŭ, što ŭ Irana zastałasia tolki «pahroza, što karabiel moža «natrapić» na adnu ź ich marskich min, jakija, darečy, lažać na dnie mora razam z usimi 28 ichnimi minnymi zaharadžalnymi sudnami».

Vydańnie Axios sa spasyłkaj na krynicy paviedamlaje, što ŭ subotu, kali ŭ Pakistanie čakajucca pramyja pieramovy pamiž ZŠA i Iranam, niekalki karabloŭ VMS ZŠA sapraŭdy pierasiekli Armuzski praliŭ, nie paviedamiŭšy pra heta Tehieranu. Heta pieršy vypadak pierasiačeńnia amierykanskim fłotam raniej zabłakavanaha marskoha šlachu z pačatku vajny. Surazmoŭcy adznačyli, što meta hetaha kroku — pavyšeńnie ŭpeŭnienaści kamiercyjnych sudnaŭ u mahčymaści prachodu praz praliŭ.

U toj ža čas Iran admaŭlaje, što luboje amierykanskaje sudna prachodziła praz praliŭ. Iranskaje ahienctva Fars śćviardžaje, što amierykanskija vajskovyja sudny paśla papiaredžańnia raźviarnulisia kala ŭvachoda ŭ praliŭ.

Raniej ZŠA, Izrail i Iran pahadzilisia na dvuchtydniovaje ŭzajemnaje spynieńnie ahniu i adkryćcio ruchu dla kamiercyjnych sudnaŭ praz Armuzski praliŭ. Pieramovy pačalisia 11 krasavika ŭ Pakistanie, amierykanskuju delehacyju ŭznačalvaje vice-prezident ZŠA Džej Dzi Vens.

Kamientary da artykuła