Anžaliku Mielnikavu bačyli ŭ Minsku ŭ «Dana Mole»

Jakraz niedaloka jana ŭ pačatku hoda kupiła kvateru.

Skrynšot z Anžalikaj Mielnikavaj z trenažornaj zały, jaki źjaviŭsia ŭ siecivie ŭ sakaviku 2026 hoda.

Byłuju śpikierku Kaardynacyjnaj rady Anžaliku Mielnikavu, jakaja źnikła hod tamu, bačyli dniami ŭ Minsku ŭ handlovym centry «Dana Moł». Jana spakojna prahulvałasia tam. Čałaviek, jaki bačyŭ jaje, kaža, što ŭ Mielnikavaj zaraz taja samaja pryčoska, jak na skrynšocie z trenažornaj zały. Sumnievaŭ u tym, što heta mienavita jana, u jaho nie zastałosia.

Cikava, što jakraz niedaloka — u ŽK «Majak Minska» — Mielnikava kupiła kvateru. Pakupka była ŭ studzieni 2026 hoda, płošča kvatery — amal 92 kvadraty, paviedamlała «Lusterka». Dahetul, u vieraśni 2025 hoda, užo paśla źniknieńnia, byłaja śpikierka KR kupiła taksama kvateru na praśpiekcie Lubimava.

U sakaviku ŭ siecivie źjavilisia skrynšoty, na jakich Mielnikava zajmajecca ŭ trenažornaj zale GYM24. Tady ŭźnikła šmat pytańniaŭ da praŭdzivaści zdymkaŭ. Ale taja zała jakraz znachodzicca niedaloka ad mietro «Uschod» — na praśpiekcie Niezaležnaści, 134 (u handlovym centry «Pieršy»).

Baćka Mielnikavaj u sakaviku kazaŭ, što jaho dačka žyvaja i zdarovaja i ŭ Biełarusi.

«Ja viedaju, što jana ŭ Biełarusi. Ź jakoha času? Nu, daŭnavata. Ničoha jana nie źnikła. Nakolki ja sam viedaju, žyvaja i zdarovaja. I dzieci, mabyć, ź joj. Chacia ja ŭnukaŭ i jaje asabista daŭno bačyŭ žyŭcom».

Zvyčajna Anžalika telefanuje baćku sama.

«Jana mnie skazała: «Ty mnie nie zvani, ja sama budu». Nu i časam telefanuje. Ale tam numar zaŭsiody schavany, nie vyznačajecca», — kazaŭ baćka.

Nahadajem, śpikierka Kaardynacyjnaj rady Anžalika Mielnikava pakinuła terytoryju Polščy 26 lutaha 2025 hoda i palacieła ŭ Łondan. Z 28 lutaha da 7 sakavika Mielnikava žyła ŭ hateli na Šry-Łancy ź dziećmi, vyśvietlili rasśledavalniki. 7 sakavika Mielnikava ź dziećmi palacieła ŭ Dubaj, tam jaje śled stračvajecca. 25 sakavika jana pierastała vychodzić na suviaź.

Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija tyčacca pracy arhanizacyi.

U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dalaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lota­ła na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.

Kamientary da artykuła