«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja
Pra dakładnaje miescaznachodžańnie i stan źnikłaj amal hod tamu, u sakaviku 2025 hoda, śpikierki Kaardynacyjnaj rady Anžaliki Mielnikavaj dahetul było ničoha nieviadoma. A nadoječy ŭ sacsietkach pačali hulać skrynšoty, dzie jana z novaj fryzuraj nibyta zajmajecca sportam u staličnaj siłoŭni sietki GYM24.
Uźnikła šmat pytańniaŭ da praŭdzivaści zdymkaŭ. Adnak mienavita tamu «Naša Niva» pad vyhladam zvyčajnaj zacikaŭlenaj asoby vyrašyła dazvanicca da muža i baćkoŭ Anžaliki i spytać u ich pra hetyja fota naŭprost.
Pa numary, jaki zarehistravany na byłoha muža Anžaliki Andreja, nam niečakana adkazaŭ žanočy hołas, jaki abiacaŭ paklikać Andreja da telefona, ale paśla hetaha suviaź pierarvałasia. Na našy zvanki adkazvać pierastali.
Da maci Anžaliki Aksany pakul dazvanicca taksama nie atrymałasia, a voś ź jaje baćkam dyjałoh zdaryŭsia. Nakont zdymkaŭ z trenažornaj zały Artur Mikałajevič ničoha nie viedaje, ale, pa jaho słovach, z dačkoj usio dobra i jana žyvie ŭ Biełarusi.
«Ja viedaju, što jana ŭ Biełarusi. Ź jakoha času? Nu, daŭnavata. Ničoha jana nie źnikła. Nakolki ja sam viedaju, žyvaja i zdarovaja. I dzieci, mabyć, ź joj. Chacia ja ŭnukaŭ i jaje asabista daŭno bačyŭ žyŭcom».
Artur Mikałajevič raspavioŭ, što apošni raz razmaŭlaŭ z dačkoj «zimoj». Zvyčajna jana telefanuje jamu sama.
«Jana mnie skazała: «Ty mnie nie zvani, ja sama budu». Nu i časam telefanuje. Ale tam numar zaŭsiody schavany, nie vyznačajecca».
Nahadajem, śpikierka Kaardynacyjnaj rady Anžalika Mielnikava pakinuła terytoryju Polščy 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika jana pierastała vychodzić na suviaź.
Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija tyčacca pracy arhanizacyi.
U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dalaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lotała na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie4
Kamientary