Anžalika Mielnikava tydzień praviała na Šry-Łancy i vylecieła ź dziećmi ŭ Dubaj

6 maja na sajcie polskaha vydańnia Polityka vyjšła rasśledavańnie «Źniknieńnie Anžaliki». Jahonyja aŭtary — palak Pavieł Reška i rasijanie Cimur Aleŭski i Jaŭhienija Tamarčanka — śćviardžali, što źniknieńnie Anžaliki Mielnikavaj moža być źviazana z hrašyma, jakija byli na rachunku fundacyi Bialorus liberty. U tym ža artykule ŭpieršyniu była ahučanaja viersija, što z Łondana Anžalika Mielnikava vylecieła na Šry-Łanku, pry hetym jaje supravadžaŭ kachanak-biełarus spartyŭnaha vyhladu, jaki moža być supracoŭnikam KDB.

10 maja ŭ tym ža vydańni vyjšła druhaja častka rasśledavańnia. 

Adpaviedna ź infarmacyjaj časopisa, Anžalika Mielnikava padarožničała z dočkami Hannaj i Taćcianaj. Tolki 25 lutaha, za dzień da vyletu ŭ Łondan, jana zabraniravała hatel Araliya va Unavatunie na Šry-Łancy. Heta vyhladaje tak, byccam ideja pajechać na vostraŭ pryjšła joj u apošniuju chvilinu albo što jana nie chacieła, kab niechta zahadzia daviedaŭsia pra jaje płany.

Broń jana zrabiła nie praz papularnyja sajty, a praź nievialikuju turystyčnuju firmu, jakaja pracuje 17 hadoŭ na Šry-Łancy i aryjentavanaja na ruskamoŭnych klijentaŭ. Atel Araliya Beach Resort & Spa — piacizorkavy. Anžalika ŭžo žyła ŭ im letaś u studzieni. Heta adno z upadabanych miescaŭ adpačynku ruskamoŭnych turystaŭ.

U vyniku sumiesnaha rasśledavańnia Polityka i The Insider pry sadziejničańni žurnalistaŭ Sunday Times in Sri Lanka atrymałasia ŭstanavić: 28 lutaha Anžalika ź dźviuma dočkami pierasiekła miažu Šry-Łanki i pajechała va Unavatunu.

Pa atrymanaj infarmacyi, padčas hetaha znachodžańnia tam z bankaŭskaha rachunku fondu, jakim kiravała Anžalika, byŭ zrobleny adzin, ale bujny pieravod.

Paśla siami dzion u hateli 7 sakavika na Šry-Łancy ŭsia trojca vylecieła rejsam Fly Dubai u Dubaj.

Vydańnie paviedamlaje, što va ŭsioj pajezdcy Anžalika karystałasia polskim pašpartam (numar FG 6*****7), jaki atrymała niadaŭna, staŭšy hramadziankaj Polščy tolki naprykancy 2024 hoda. Heta była jaje treciaja pajezdka ŭ Dubaj za apošni hod.

Kali žurnalisty źbirali materyjał dla artykuła pra źniknieńnie žančyny, składałasia ŭražańnie, što rasśledavańnie buksuje. Pracoŭnaje miesca Mielnikavaj zastavałasia niekranutym, papiery nichto nie hladzieŭ, kaleh nie dapytvali, siabroŭ nie šukali, miescy, dzie jana byvała, nie naviedvalisia.

Paśla vychadu pieršaha tekstu ŭ Polityka stała viadoma, što pačalisia pieršyja dopyty. Heta adbyłosia praz dva z pałovaj miesiacy paśla jaje adjezdu i paŭtara miesiaca paśla paviedamleńnia ab źniknieńni.

Nahadajem, što pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.

10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma. 

14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.

• 2
• 0
• 7
• 17
• 2
• 1
• 1
• 0