Paradoks, ale pryznańnie EHU ekstremisckim raźviaža jamu ruki
abmiarkoŭvajcie!
Pryznańnie Jeŭrapiejskaha humanitarnaha ŭniviersiteta ekstremisckim vymušaje zadumacca pra źmieny ŭ jaho kancepcyi, piša Mikoła Buhaj.
Dzień Voli ŭ Vilni, 25 sakavika 2026 hoda. Fota: «Naša Niva»
Nie sumniajusia, što Jeŭrapiejski humanitarny ŭniviersitet vystaić. Budzie praciahvać vučyć, budzie praciahvać nabirać studentaŭ. Tak, nabory pamienšajuć. Što ž — mienš dyk mienš.
Ale pry hetym EHU stanie lahčej vykonvać svaju inšuju naturalnuju misiju. Raniej univiersitet, kab nie naklikać dadatkovyja represii, vymušana trymaŭ dystancyju ad hramadzianskaj supolnaści. Zaraz ža sama situacyja daje EHU šanc zrabicca daśledčym centram i płatformaj dla hramadzianskich inicyjatyŭ.
Skažam, biełarusam treba b mieć niezaležny Centr histaryčnych daśledavańniaŭ jak alternatyvu Instytytu historyi NAN. Čamu b jamu nie ŭźniknuć na bazie histaryčnaha kirunku EHU?
Biełarusam treba žurfak u vyhnańni, kab rychtavać kadry dla niezaležnych ŚMI — čamu b nie stvaryć heta na bazie EHU?
Biełarusam treba analityčnyja centry. Čamu b im nie isnavać pad kryłom EHU?
Biełarusy majuć Muziej imia Ivana Łuckieviča, kulturnyja prastory. Čamu b EHU nie być bazaj i dla ich?
Biełaruski humanitarny chab, Navukova-praktyčny centr — śpiecyjalisty pravilniej sfarmulujuć nazvy dla hetych novych funkcyj. Bo ž ciapier EHU — u adnoj z hramadzianskaj supolnaściu lizie ekstremistaŭ.
I praciahvać nabor studentaŭ. Kolki budzie nabiracca — stolki budzie nabiracca. Tak u svoj čas u vyhnańni dziejničaŭ Ukrainski volny ŭniviersitet.
Mnie takaja stratehija padajecca najmacniejšym asimietryčnym adkazam na krok łukašystaŭ. Bo łohika minskaj administracyi — adrazać lubyja jeŭrapiejskija ŭpłyvy i pryviazki, nie pakinuć biełarusam nijakaj alternatyvy — tolki łukašyzm i Rasija.
Studenty zaraz nie zmohuć viartacca ŭ Biełaruś, ale dla idej i viedaŭ niama miežaŭ.