EHU — «ekstremisckaja arhanizacyja». Što ciapier rabić studentam i vypusknikam? I što im pahražaje?

14 krasavika stała viadoma, što Viarchoŭny sud pryznaŭ Jeŭrapiejski humanitarny ŭniviersitet «ekstremisckaj arhanizacyjaj». Što heta aznačaje i što ciapier pahražaje ludziam, jakija tym ci inšym čynam źviazanyja z hetaj VNU?

Na hety momant u Biełarusi naličvajecca 345 «ekstremisckich farmavańniaŭ» i 7 «ekstremisckich arhanizacyj». U čym pryncypovaja roźnica miž imi, niezrazumieła. Tym bolš što Biełaruski rasśledavalnicki centr i vydańnie «Lusterka» ličacca i farmavańniami, i arhanizacyjami adnačasova. 

Techničnaje adroźnieńnie ŭ tym, što «ekstremisckija farmavańni» abviaščajucca rašeńniami KDB i MUS, a «ekstremisckija arhanizacyi» — rašeńniem Viarchoŭnaha suda. Ale ŭsie iduć jany adnym pieralikam sa skraznoj numaracyjaj.

Tearetyčna da ŭdzielnikaŭ «ekstremisckaj arhanizacyi» — u tym liku EHU — nie pavinien prymianiacca artykuł 361‑1 Kryminalnaha kodeksa (Stvareńnie ekstremisckaha farmavańnia albo ŭdzieł u im). Adnak i biez hetaha chapaje artykułaŭ, jakija možna było b prypisać lubomu datyčnamu da EHU:

• 361‑2 (finansavańnie ekstremisckaj dziejnaści)
• 361‑4 (sadziejničańnie ekstremisckaj dziejnaści)
• 361‑5 (prachodžańnie navučańnia ci inšaj padrychtoŭki dla ŭdziełu ŭ ekstremisckaj dziejnaści).

Usie jany dapuskać u tym liku i termin u kałonii. Maksimum — 7 hadoŭ.

EHU pakul nie kamientuje situacyju.

Voś što ličyć pa hetaj temie «Viasna»:

«Da niadaŭniaha času ekstremisckimi pryznavalisia vyklučna infarmacyjnyja materyjały ŭniviersiteta. Heta aznačała ryzyku administracyjnaj adkaznaści, naprykład, sutki aryštu za repost publikacyi z sacyjalnych sietak EHU. Ciapier situacyja kardynalna pahoršyłasia: novy status ciahnie za saboj pahrozu atrymańnia realnych kryminalnych terminaŭ.

Važna razumieć, što hetyja ryzyki ŭ roŭnaj stupieni tyčacca ŭsioj akademičnaj supolnaści: ciapierašnich studentaŭ, vypusknikoŭ, adličanych navučencaŭ, a taksama vykładčyckaha składu i administracyi. Hałoŭnaja pahroza kryjecca ŭ kryminalnym pieraśledzie pa artykułach za spryjańnie ekstremisckaj dziejnaści pa artykule 361‑4 KK i jaje finansavańnie pa artykule 361‑2 KK.

Akramia taho, nieabchodna ŭličvać tryvožnuju dynamiku 2025 i 2026 hadoŭ. U hety pieryjad zafiksavany surjozny rost kolkaści sprob viarboŭki studentaŭ i pramych pahroz u sacyjalnych sietkach, pieravažna z boku supracoŭnikaŭ biełaruskich śpiecsłužbaŭ.

Hałoŭnaja i nastojlivaja rekamiendacyja: usim, chto maje ci kali-niebudź mieŭ dačynieńnie da ŭniviersiteta, varta ŭstrymacca ad pajezdak u Biełaruś. Ryzyka kryminalnaha pieraśledu absalutna realnaja i tyčycca kožnaha.

Treba pravieści žorstki aŭdyt svajoj ličbavaj hihijeny: całkam schavać abo vydalić lubyja zhadki pra navučańnie/pracu ŭ EHU z publičnych profilaŭ, pačyścić historyju pierapisak i fotaarchivy, adpisacca ad staronak univiersiteta sa svaich asnoŭnych akaŭntach. Ni pry jakich abstavinach nie varta ŭstupać u dyjałoh z padazronymi akaŭntami, jakija prapanujuć «vyrašyć pytańnie» abo pahražajuć nastupstvami», — havorycca ŭ kamientary, padrychtavanym dla «Našaj Nivy».

Pa temie vykazalisia i ŭłady, praŭda, pakul davoli kryva: małapiśmiennym dopisam (u jakim błytajucca ekstremisckija «farmavańni» i «arhanizacyi») u pamyjnym kanale «ŽS. Adukacyja», blizkim da Ministerstva adukacyi. Ciažka zrazumieć, kolki ŭ hetym dopisie asabistaha mierkavańnia administrataraŭ, a kolki realnaha tłumačeńnia taho, jak ułady płanujuć dziejničać dalej.

«Ciapier sam fakt uzajemadziejańnia z VNU, reposty infarmacyi pra jaho, uvachod u sacyjalnyja sietki, nie kažučy ŭžo pra pastupleńnie, buduć kvalifikavacca pavodle artykułaŭ ab udziele ŭ ekstremisckim farmavańni.

Tyja, chto maje dypłomy EHU papiarednich hadoŭ, ale nie ździajśniaŭ złačynstvaŭ, NIE buduć aŭtamatyčna pryciahnutyja da kryminalnaj adkaznaści. Adnak paśla ŭstupleńnia ŭ siłu rašeńnia Viarchoŭnaha suda navučańnie i atrymańnie dypłoma moža kvalifikavacca pavodle art. 361-5, 361-1, 361‑4 KK RB. Zabaraniajecca taksama raspaŭsiudžvańnie simvoliki, publikacyj EHU i hetak dalej».

• 2
• 3
• 3
• 12
• 0
• 0
• 16
• 0