Biełarus, jakomu zabaranili ŭjazdžać u Jeŭropu, znajšoŭ chitry sposab, jak heta abyści
Biełarus, jakomu raniej zabaranili ŭjezd u Polšču i krainy Šenhienskaj zony, zdoleŭ abychodzić hetuju zabaronu na praciahu dvuch hadoŭ, źmianiŭšy proźvišča, piša Reform.news.
Zdymak ilustracyjny. Fota: «Naša Niva»
Jak paviedamlacca, mužčyna ŭziaŭ proźvišča maci, aformiŭ novy pašpart i pad inšymi asabistymi danymi praciahvaŭ jeździć za miažu. Ź lutaha 2024 hoda da studzienia 2026‑ha jon nie mienš jak dziesiać razoŭ pierasiakaŭ miažu — praz punkt propusku ŭ Tarespali i praz Varšaŭski aeraport.
Ale ŭ vyniku jaho ŭsio ž vykryli i zatrymali. Sud adbyŭsia ŭ Polščy. 41‑hadovaha mužčynu pryznali vinavatym u šmatrazovym niezakonnym pierasiačeńni dziaržaŭnaj miažy z vykarystańniem padmanu. Usie hetyja vypadki sud razhladaŭ jak adno praciahłaje pravaparušeńnie.
Biełarusu pryznačyli pakarańnie ŭ vyhladzie šaści miesiacaŭ pazbaŭleńnia voli z adterminoŭkaj na dva hady. Heta značyć, što kali jon nie ździejśnić novych parušeńniaŭ, to ŭ turmu nie trapić, ale ŭ vypadku paŭtoru nastupstvy buduć značna bolš surjoznyja.
Čytajcie taksama:
U Polščy zatrymali hrupu internet-machlaroŭ. Siarod ich — hramadzianin Biełarusi
U Polščy biełarusa złavili z amfietaminam i chutka departavali