Blizkija 74‑hadovaha śviatara, jaki zahinuŭ na trasie pad Fanipalem, kažuć, što jon nie pierabiahaŭ darohu, a ratavaŭ paranienaha sabaku

21 krasavika na šašy R-1 Minsk — Dziaržynsk zahinuŭ 74‑hadovy śviatar Uładzimir Badziulkin. Pavodle viersii siłavikoŭ, śviatar vyrašyŭ pierabiehčy trasu za niekalki mietraŭ ad padziemnaha pierachoda. Rodnyja mužčyny padzialilisia ŭ sacsietkach svajoj viersijaj historyi.

Uładzimir Badziulkin. Fota: molod-eparchy.by

Dačka Uładzimira napisała, što mužčyna nie pierabiahaŭ darohu. Pavodle słoŭ žančyny, jon prosta chacieŭ ździejśnić dobry ŭčynak:

«Moj baćka pryparkavaŭsia ŭ dazvolenym miescy, uklučyŭ pry hetym avaryjnuju sihnalizacyju na mašynie. Spuściŭsia ŭ padziemny pierachod i vyjšaŭ na supraćlehłym baku, kab vyratavać paranienaha sabaku, što paćviardžaje zapis ź videarehistratara».

Žančyna dadała, što ciapier idzie śledstva pa hetaj historyi. Jana spasyłajecca na śledčaha, jaki kazaŭ joj pra znojdzienaha sabaku i pytaŭsia, ci byŭ sabaka ŭ jaje baćki.

U kamientary pryjšli vidavočcy, jakija taksama bačyli, što na miescy zdareńnia byŭ sabaka. Praŭda, raspoviedy pra toje, u jakim stanie była žyvioła, nie supadajuć: niechta bačyŭ sabaku, jakoha źbiła mašyna, a niechta raskazvaje, što sabaka byŭ žyvy i śviatar prosta chacieŭ jaho prybrać z darohi.

Trahiedyja adbyłasia ŭviečary 21 krasavika na 23‑m kiłamietry trasy R-1 Minsk — Dziaržynsk. Uładzimira źbiła 25‑hadovaja dziaŭčyna, jakaja na «Falksvahienie» jechała ŭ bok Minska. U miescy, dzie zahinuŭ mužčyna, daroha za košt pałasy razhonu robicca vaśmipałosnaj — to-bok kali b śviatar nasamreč pierabiahaŭ tam darohu, heta było b duža niebiaśpiečna.

Raźvitalisia z Uładzimiram 23 krasavika ŭ fanipalskaj carkvie Ušeścia Haspodniaha, dzie mužčyna 25 hadoŭ słužyŭ nastajacielem. Dziaržynski Śledčy kamitet raspačaŭ kryminalnuju spravu pa č.2 art. 317 KK — parušeńnie PDR, jakoje vyklikała pa nieaściarožnaści śmierć čałavieka.

Kamientary da artykuła