Tusk: Siarod vyzvalenych siońnia — biełarus, jaki supracoŭničaŭ z polskimi śpiecsłužbami

Premjer-ministr Polščy Donald Tusk na pres-kanfierencyi 28 krasavika zajaviŭ, što siarod vyzvalenych u miežach siońniašniaha abmienu pamiž Biełaruśsiu i Polščaj, akramia Andreja Pačobuta i Hžehaža Havieła — hramadzianin Biełarusi, jaki supracoŭničaŭ z polskimi śpiecsłužbami. 

Donald Tusk i Andrej Pačobut. Sustreča na miažy

«Siarod vyzvalenych siońnia — Andžej Pačobut, piśmieńnik, žurnalist i zmahar za svabodu biełarusaŭ. Akramia jaho, byli vyzvalenyja ksiondz Havieł, a taksama biełarus, jaki supracoŭničaŭ z polskimi śpiecsłužbami», — zajaviŭ Tusk.

Imia vyzvalenaha jon, adnak, nazyvać nie staŭ, spasyłajučysia na jaho prośbu. Ale viadoma, što ŭ kancy 2024 hoda da 19 hadoŭ źniavoleńnia pa abvinavačańni ŭ špijanažy na karyść Polščy i vydačy dziaržaŭnych tajamnic byŭ asudžany biełaruski vajskoviec Dźmitryj Paźniakoŭ. Jaho sudzili razam z hramadzianinam Polščy Tomašam Biarozam, jaki atrymaŭ 14 hadoŭ. Mahčyma, havorka ŭ hetym vypadku moža iści akurat pra Paźniakova.

Pa słovach Tuska, praces vyzvaleńnia Pačobuta byŭ vielmi składanym:

«My rabili mnostva sprob pierakanać biełaruski režym vyzvalić jaho. Było vielmi ciažka raźličvać na dobrasumlennaść z boku Minska. Padčas adnoj z apošnich sprob abmienu źniavolenymi biełaruski bok źmianiŭ svajo rašeńnie i admoviŭsia», — zajaviŭ Tusk.

Urešcie vyzvaleńnie Pačobuta i inšych stała mahčymym dziakujučy tamu, što Polšča zmahła prapanavać Biełarusi i Rasii dla abmienu ludziej, zatrymanych pa abvinavačańni ŭ dyviersijach.

Kamientary da artykuła