Minskaja «Piasočnica» adkryjecca 7 maja. A mahła nie adkrycca ŭvohule
Arhanizatary strytfud-placoŭki «Piasočnica» ŭ Minsku paviedamili, što novy siezon adkryjecca 7 maja a 16:00. Placoŭka znachodzicca na vulicy Kujbyšava i ličycca pieršaj adkrytaj strytfud-łakacyjaj u stalicy.
Fota arhanizataraŭ «Piasočnicy»
Heta budzie ŭžo dziaviaty letni siezon «Piasočnicy». Jon praciahniecca 130 dzion — da 13 vieraśnia.
Jak i raniej, dla haściej buduć pracavać 15 hastranamičnych apierataraŭ. Siarod ich nazvanyja «Dranički», Pizza Truck Napoli, Grill Factory, Trdlo House i inšyja. Adno miesca pakul zastajecca volnym.
U novym siezonie naviedvalnikam abiacajuć nasyčanuju prahramu: lekcyi, kirmašy, muzyčnyja vystupleńni, fiestyvali, vystavy, majstar-kłasy, kinapakazy i dziciačyja zabavy.
Taksama płanujucca tranślacyi futbolnych matčaŭ, viečary nastolnych hulniaŭ, aŭta– i motavystavy. Źjaviacca i novyja fotazony.
Raniej paviedamlałasia, što ŭ arhanizataraŭ uźnikli ciažkaści z arandatarami, tamu data adkryćcia doŭhi čas zastavałasia nieviadomaj.
Akramia taho, u hetym hodzie ŭ Minsku pierazapuścili hastraplacoŭku «Najlepšaja vulica» i adkryli novy hastraskvier «Manifiest».
Čytajcie taksama:
U Minsku adkryvajecca novy hastradvor. Heta samaja vialikaja strytfud-placoŭka ŭ horadzie