Marka Rubia na nastupnym tydni pajedzie ŭ Rym i Vatykan vypraŭlać adnosiny

Dziaržaŭny sakratar ZŠA Marka Rubia na nastupnym tydni naviedaje Rym i Vatykan na fonie napružanaści ŭ adnosinach pamiž Vašynhtonam, Śviatym Pasadam i Italijaj, paviedamlaje italjanskaje vydańnie Corriere della Sera.

Marka Rubia. Fota: AP Photo/Rod Lamkey, Jr.

Čakajecca, što vizit adbudziecca ŭ čaćvier i piatnicu. Spačatku Rubia pajedzie ŭ Vatykan, dzie, vierahodna, sustreniecca ź dziaržaŭnym sakratarom Śviatoha Pasadu Pjetra Paralinam. Paśla hetaha jon nakirujecca ŭ Rym, dzie zapłanavanyja sustrečy ź ministram zamiežnych spraŭ Italii Antonia Tajani i ministram abarony Hvida Krazieta.

Taksama paviedamlajecca, što amierykanski čynoŭnik paprasiŭ pra sustreču z premjer-ministarkaj Italii Džordžaj Miełoni. Pakul takaja sustreča ni paćvierdžanaja, ni vyklučanaja.

Vizit projdzie na fonie paharšeńnia adnosin pamiž ZŠA i Italijaj. Apošnim časam pamiž prezidentam ZŠA Donaldam Trampam i Džordžaj Miełoni ŭźnik kanflikt paśla taho, jak Tramp rezka raskrytykavaŭ zakliki Papy Lva XIV da miru na Blizkim Uschodzie.

Miełoni nazvała vykazvańni amierykanskaha lidara nieprymalnymi. U adkaz Tramp abvinavaciŭ jaje ŭ adsutnaści mužnaści i zajaviŭ, što ich dačynieńni ŭžo nie takija, jak raniej.

Akramia taho, jon dapuściŭ mahčymaść skaračeńnia amierykanskaha vajskovaha kantynhientu ŭ Italii, śćviardžajučy, što hetaja kraina nibyta ničym nie dapamahła ŭ vajnie suprać Irana.

Jość śviedčańni, što vierbalnaja vajna Trampa z Papam, padčas jakoj jon navat vystaviŭ u sacsietkach bluźnierskuju vyjavu siabie samoha ŭ vyhladzie Miesii, nie pajšła jamu na karyść, i jon staŭ stračvać padtrymku ŭ kansiervatyŭnych kołach.

Kamientary da artykuła