Praz kanflikt z Papam Tramp pačaŭ stračvać padtrymku vybarščykaŭ. U Vašynhtonie zahavaryli pra prymireńnie
Publičny kanflikt pamiž prezidentam ZŠA Donaldam Trampam i Papam Rymskim Lvom XIV pačaŭ adbivacca na elektaralnych pazicyjach amierykanskaha lidara. Paśla ŭzajemnaj krytyki, abvinavačvańniaŭ i admieny vizitu pantyfika ŭ ZŠA, rejtynhi Trampa siarod chryścijanskich vybarščykaŭ papaŭźli ŭniz. Na hetym fonie administracyja Biełaha doma robić sproby zhładzić situacyju.
Jak paviedamlaje vydańnie Bild, sutyčka pačałasia z krytyki z boku Papy sučasnaj mižnarodnaj palityki.
Padčas svajho niadaŭniaha vizitu ŭ Kamierun pantyfik zajaviŭ, što śviet «razburajecca žmieńkaj tyranaŭ», i asudziŭ tych, chto skažaje relihiju dla vajennych i ekanamičnych met. Heta było ŭspryniata jak pramaja krytyka dziejańniaŭ ZŠA na Blizkim Uschodzie. Jašče raniej Pientahon vyklikaŭ papskaha nuncyja, kab vykazać niezadavolenaść miratvorčymi zaklikami Vatykana.
U adkaz Tramp abrynuŭsia na pantyfika z krytykaj, nazvaŭšy jaho «žachlivym» u pytańniach źniešniaj palityki. Situacyja jašče bolš abvastryłasia, kali prezident ZŠA apublikavaŭ u sacyjalnych sietkach zhienieravanyja štučnym intelektam malunki, dzie jon staić pobač ź Isusam abo prosta paŭstaje ŭ jaho vobrazie. Paśla chvali abvinavačvańniaŭ u bohaźnievažańni Tramp vydaliŭ adzin z dopisaŭ, patłumačyŭšy, što «dumaŭ, što pakazany ŭ roli doktara».
U vyniku skandału i biesprecedentnych namiokaŭ z boku Pientahona pra mahčymaje «vykradańnie», Vatykan admianiŭ zapłanavanuju na hety hod pajezdku Papy Lva XIV u ZŠA.
Sam Papa paźniej patłumačyŭ žurnalistam, što jahonaja pramova ŭ Kamierunie była napisanaja za dva tydni da krytyki z boku Trampa i nie była adrasavanaja niepasredna jamu.
«Ale jaje ŭspryniali tak, byccam ja sprabuju pačać novuju dyskusiju z prezidentam, da čaho ŭ mianie niama nijakaj cikavaści», — adznačyŭ jon. Razam z tym pantyfik dadaŭ, što nie baicca administracyi ZŠA i budzie dalej vystupać suprać vojnaŭ.
Hety palityčny klinč pačaŭ kaštavać Trampu hałasoŭ. Pavodle danych Pew Research Center, padtrymka prezidenta siarod katalickich vybarščykaŭ źniziłasia z 55% da 46%. Niezadavolenaść raście i siarod pratestantaŭ, jakija doŭhi čas byli jahonaj samaj ustojlivaj bazaj.
«Pavodziny Trampa staviać ludziej, jakija hadami jaho padtrymlivali, u niajomkaje stanovišča», — zajaviŭ upłyvovy jevanhielski pastar Eryk Eryksan.
Jak adznačajuć ekśpierty, hetaja tendencyja aznačaje, što značnaja častka pravych vybarščykaŭ moža apynucca ŭ apazicyi da Trampa na listapadaŭskich pramiežkavych vybarach u Kanhres. Strata respublikancami bolšaści moža istotna abmiežavać upłyŭ prezidenta.
Uśviedamlajučy hetyja ryzyki, administracyja ZŠA pačała rabić kroki da prymireńnia. Vice-prezident Džej Dzi Vens niadaŭna apublikavaŭ prymirenčy dopis:
«Papa Leŭ prapavieduje Jevanhielle, jak jamu i naležyć, i heta niepaźbiežna aznačaje, što jon vykazvaje svajo mierkavańnie pa aktualnych maralnych pytańniach. Prezident i ŭsia administracyja pracujuć nad tym, kab prymianiać hetyja maralnyja pryncypy ŭ našym biazładnym śviecie».
Vatykan pakul nijak nie prakamientavaŭ hetuju zajavu.
Kamientary
Chto nastupny na čarzie - viedaje adzin Tramp, bo zaŭsiody chavaje svaje śpiecapieracyi ŭ sakrecie.