Minabarony Biełarusi raspaŭsiudziła novy ŭbohi fejk
Śćviardžajuć, što žonka ministra abarony Ukrainy nabyła jachtu za 26 miljonaŭ jeŭra.
Jachta Tankoa S501 Vertige. Fota: ruyachts.com
Infarmacyja pra nibyta nabyćcio žonkaj ministra abarony Ukrainy Michaiła Fiodarava darahoj jachty źjaviłasia ŭ rasijskich ŚMI 1 maja. Paźniej jaje stali masava raspaŭsiudžvać inšyja miedyja, źviazanyja z Rasijaj. Siarod ich akazalisia i kanały, źviazanyja ź Ministerstvam abarony Biełarusi.
U publikacyjach śćviardžałasia, što Anastasija Fiodarava nibyta nabyła na Francuzskaj Ryŭjery 50‑mietrovuju jachtu Tankoa S501 Vertige koštam kala 26 miljonaŭ jeŭra. U jakaści «dokazu» niekatoryja resursy raspaŭsiudzili vyjavu siertyfikata rehistracyi sudna. Na im paznačana data — 8 krasavika 2026 hoda, a taksama śćviardžajecca, što Fiodarava vałodaje jachtaj napałovu z francuzskaj kampanijaj.
Asobna ŭ hetych paviedamleńniach padkreślivałasia, što ŭ Jeŭropie hučać aściarohi nakont mahčymych złoŭžyvańniaŭ srodkami — u tym liku kredytam u pamiery 90 miljardaŭ jeŭra, jaki ES moža vydzielić Ukrainie.
Adnak, jak vyśvietlili supracoŭniki Centra supraćdziejańnia dezynfarmacyi, imia Anastasii Fiodaravaj nie fihuruje ŭ aficyjnych rejestrach uładalnikaŭ hetaha sudna, a sapraŭdnyja dakumienty francuzskaha rehistra sudnaŭ majuć inšuju strukturu i vyhlad.
Raspaŭsiudžvańnie takich iłžyvych paviedamleńniaŭ — heta častka metanakiravanaj infarmacyjnaj kampanii. Jana nakiravanaja na dyskredytacyju Ukrainy i ŭkraincaŭ, raspalvańnie varožaści da ich i padryŭ padtrymki Ukrainy krainami ES.
Kanały, źviazanyja z uładami Biełarusi, jašče ni razu nie abviarhali apublikavanyja ŭ ich fejki. A za ich raspaŭsiud nichto nie panios adkaznaści, praduhledžanaj zakanadaŭstvam.
Skryn sajta ruyachts.com na 15 hadzin 3 maja 2026 hoda.
Admietna, što infarmacyja pra toje, što jachta Tankoa S501 Vertige zastajecca niepradadzienaj, visić na śpiecyjalizavanych sajtach, u tym liku ruyachts.com.
Čytajcie taksama:
Čarhovy fejk: Zialenski nibyta padaryŭ svajoj maci kvateru ŭ Dubai za 3,2 miljona dalaraŭ
«Zialenski kupiŭ rezidencyju Hitlera». Voś adkul prapahanda ŭziała novy fejk