«Zialenski kupiŭ rezidencyju Hitlera». Voś adkul prapahanda ŭziała novy fejk
Uśled za kramloŭskimi miedyja fejk padchapili łukašenkaŭskija.
Pra toje, što Uładzimir Zialenski nibyta nabyŭ rezidencyju «Arlinaje hniazdo» ŭ Alpach u Bavaryi, jakaja naležała Adolfu Hitleru, napisali roznyja prakramloŭskija ŚMI: «Hazieta.ru», «Arhumienty i Fakty», «Maskoŭski kamsamolec».
Padchapili i dziaržaŭnyja biełaruskija, naprykład, ANT.
Krynicaj hetaj infarmacyi staŭ telehram-kanał supracoŭnika prakramloŭskaha ahienctva «Rośsija Siehodnia», člena Hramadskaj pałaty Armiena Hasparana, piša The Insider. U publikacyi Hasparan spasyłajecca na niejkaje niamieckaje vydańnie Aktuelle Nachrichten in Deutschland («Biahučyja naviny ŭ Hiermanii»).
Internet-archiŭ upieršyniu vyjaviŭ heta miedyja 14 śniežnia 2024 hoda, da hetaha nijakich prykmiet jaho isnavańnia nie było. «Vidać, heta čarhovaje fejkavaje vydańnie, stvoranaje rasijskimi prapahandystami dla dezinfarmacyjnaha ŭkidu», — piša The Insider.
Žurnalisty taksama vyvučyli «damovu kupli-prodažu», apublikavanyja Aktuelle Nachrichten in Deutschland. Dakumient padpisany čynoŭnicaj ź inšaj administracyjnaj akruhi, a jaje imia i pasada čamuści schavanyja.
Akramia taho, infarmacyja pra toje, što rezidencyja budzie zakrytaja dla turystaŭ, taksama akazałasia iłžyvaj: słavutaść zakryli na zimu, adkryćcio čakajecca 9 maja 2025.
«Hazieta.ru» paźniej vydaliła fiejk.
Heta ŭžo nie pieršy raz, kali prapahanda Pucina i Łukašenki zapuskaje fejki pra Zialenskaha i jaho atačeńnie. Naprykład, letaś ukidvałasia navina pra toje, što Alena Zialenskaja nibyta kupiła šykoŭny aŭtamabil Bugatti za $4,5 miljona. Dla raspaŭsiudu fejku taksama stvarali falšyvy francuzski ŚMI.
Kamientary