Čarhovy fejk: Zialenski nibyta padaryŭ svajoj maci kvateru ŭ Dubai za 3,2 miljona dalaraŭ
Rasijskija infarmacyjnyja kanały znoŭ sprabujuć ačarnić prezidenta Ukrainy. Na hety raz jany «znajšli» nieruchomaść u Arabskich Emiratach.
5 červienia ŭ rasijskich ŚMI pajšła chvala pierapostaŭ naviny ab tym, što ŭ dubajskim rejestry nieruchomaści vyjaŭlena kvatera ŭ samym vysokim budynku płaniety Burdž-Chalifa, uładalnikam jakoj značycca maci prezidenta Ukrainy Ryma Zialenskaja.
U jakaści krynicy infarmacyi adnyja paznačajuć telehram-kanał «Hołas Mardora», inšyja spasyłajucca na «aficyjny kanał Al Arabiya».
Dla bolšaj praŭdzivaści ŭ telehram-kanałach raźmieščana videa hetaj naviny, jakoje supravadžajecca pierakładam na anhlijskuju movu i subcitrami na ruskaj. U videa navat demanstrujecca Initial Contract of Sale z dataj uhody — 16 vieraśnia 2024 hoda, koštam 11,8 miljona dyrchamaŭ i imia pakupnika — Rimma Zelenska. Aŭtary fejka ŭdakładniajuć, što košt adpaviadaje 3,2 miljonam dalaraŭ.
Samaje cikavaje, što ŭ videa ŭ jakaści krynicy infarmacyi padajecca sajt alchourok.com. Ale stvaralniki fejku tak śpiašalisia, što dapuścili pamyłku ŭ napisańni sajta, jaki vydaje siabie za tuniski infarmacyjny resurs, — jany prapuścili adnu litaru. Pravilnaje napisańnie — www.alchourouk.com. Cikava i toje, što data naviny na sajcie — 2 červienia 2025 hoda.
Pry bolš detalovym vyvučeńni profilaŭ vydańnia, na jakija viaduć knopki sacyjalnych sietak, jakija raźmieščany na sajcie, my vyśvietlili dziŭnyja rečy.
Naprykład, spasyłka ŭ tvitary viadzie na pusty profil, a instahram-staronka źmiaščaje spasyłku na YouTube-kanał, jaki nie maje nijakaha dačynieńnia da ŚMI i nie supadaje z YouTube-kanałam, na jaki pieranakiroŭvaje knopka na hałoŭnaj staroncy sajta.
Darečy, u instahram-profili paznačany łahin «Alchourouk_tn», adnak vydańnia z takim adrasam u nacyjanalnym damiennym poli «.tn» nie isnuje.
Usio heta vyklikaje surjoznyja sumnievy ŭ aŭtentyčnaści jak samoha sajta, tak i infarmacyi, što na im publikujecca.
Zrazumieła, što ni na aficyjnym sajcie Al Arabiya, ni na jaho jutub-kanale takoj naviny niama. Adsutničaje jana i na inšych resursach jak na arabskaj, tak i na anhlijskaj movach. A voś u ruskamoŭnym siehmiencie internetu čamuści mienavita siońnia jana pačała chutkimi tempami raspaŭsiudžvacca.
Kamientary
Du ma jcie!)))