Sakretnaja kafiedra Baŭmanaŭskaha ŭniviersiteta Rasii ciapier rychtuje chakieraŭ i dezynfarmataraŭ dla HRU — rasśledavańnie
Va ŭniviersitecie imia Baŭmana dziejničaje faktyčna zakrytaja škoła HRU, dzie studentaŭ vučać uzłomu kampjutarnych sietak, elektronnaj raźviedcy, psichałahičnym apieracyjam i stvareńniu dezynfarmacyjnych kampanij. Vypuskniki prahramy traplajuć u padraździaleńni, jakija Zachad źviazvaje z kibieratakami na krytyčnuju infrastrukturu ŭ Jeŭropie i ZŠA.
Hałoŭny korpus MDTU imia Baŭmana. Fota: Wikimedia Commons
Žurnalisty The Guardian, Der Spiegel, Le Monde, The Insider, Delfi i VSquare atrymali bolš za dźvie tysiačy ŭnutranych dakumientaŭ MDTU imia Baŭmana. Siarod ich — navučalnyja prahramy, kantrakty vykładčykaŭ, ekzamienacyjnyja materyjały i źviestki pra raźmierkavańnie vypusknikoŭ.
Hetyja materyjały achoplivajuć pieryjad da 2025 hoda i dazvalajuć daviedacca padrabiaznaści taho, jak u Rasii arhanizavana sistema padrychtoŭki budučych supracoŭnikaŭ HRU na bazie «Kafiedry №4», viadomaj taksama jak «Śpiecyjalnaja padrychtoŭka».
Navučalnaja prahrama
Zhodna z dakumientami, Kafiedra №4, intehravanaja ŭ vajskovy navučalny centr univiersiteta, padzielena na try śpiecyjalizavanyja kirunki. Samy značny ź ich pad kodam 093400 maje nazvu «Śpiecyjalnaja słužba raźviedki».
Z dakumientaŭ vynikaje, što pradstaŭniki HRU niepasredna kantralujuć adbor studentaŭ, prymajuć ekzamieny i vyrašajuć, kudy vypusknik budzie nakiravany paśla zakančeńnia vučoby.
Były vysokapastaŭleny čynoŭnik rasijskaha Ministerstva abarony apisaŭ hetu sistemu jak svojeasablivy «kanviejer»: pierśpiektyŭnych školnikaŭ adbirajuć jašče ŭ junym uzroście, paśla jany pastupajuć u Baŭmanaŭski ŭniviersitet, a adtul traplajuć u śpiecsłužby.
Kiraŭnikom kafiedry nazyvajecca padpałkoŭnik Kirył Stupakoŭ — śpiecyjalist pa radyjoelektronnaj raźviedcy. Pavodle dakumientaŭ, u 2022 hodzie jon padpisaŭ kantrakt z vajskovaj čaściu №45807, jakaja ŭvachodzić u strukturu HRU.
Na svaich zaniatkach Stupakoŭ vykładaje mietodyki elektronnaha sačeńnia i tajnaha nazirańnia. Na słajdach prezientacyj u PowerPoint, raspracavanych dla jaho lekcyj, demanstrujucca schavanyja kamiery pad vyhladam datčykaŭ dymu, pryłady dla pierachopu naciskańniaŭ kłaviš i kabieli manitoraŭ, zdolnyja tajna rabić skrynšoty ekrana.
Siarod vykładčykaŭ zhadvajecca i hienierał-major Viktar Niatykša — čałaviek, jakoha Zachad ličyć adnym z kiraŭnikoŭ chakierskaj hrupy Fancy Bear.
Hetaje padraździaleńnie HRU amierykanskija ŭłady abvinavačvali va ŭmiašańni ŭ prezidenckija vybary ŭ ZŠA ŭ 2016 hodzie.
Jak vynikaje z navučalnych materyjałaŭ, jakija trapili da žurnalistaŭ, adzin z asnoŭnych kursaŭ, raźličany na 144 hadziny, nazyvajecca «Abarona ad techničnaj raźviedki». Na praciahu dvuch siemiestraŭ studenty vyvučajuć mietodyki ataki na kampjutarnyja sietki, uraźlivaści prahramnaha zabieśpiačeńnia, pierabor parolaŭ i vykarystańnie trajanskich prahram.
Dla zdačy kursa nieabchodna pravieści praktyčnyja ataki na sietki, a taksama samastojna raspracavać kampjutarny virus.
Asobnyja lekcyi pryśviečanyja struktury amierykanskich i brytanskich śpiecsłužbaŭ, zachodniaj raźviedcy ŭ vajnie va Ukrainie i vykarystańniu bieśpiłotnikaŭ.
Akramia techničnaj padrychtoŭki, prahrama achoplivaje infarmacyjnuju vajnu. Studenty starejšych kursaŭ pavinny prajści sieminar pa raspracoŭcy kampanii dezynfarmacyi.
Im stavicca zadača stvaryć videa dla sacyjalnych sietak z vykarystańniem «manipulacyj, cisku i prychavanaj prapahandy». Budučych apieratyŭnikaŭ vučać miechanizmam psichałahičnaha manipulavańnia i tamu, jak naviazać aŭdytoryi «pravilnaje» ŭsprymańnie infarmacyi.
Pry hetym navučalnyja materyjały nasyčanyja aficyjnaj kramloŭskaj rytorykaj. U ich śćviardžajecca, što vajna suprać Ukrainy była «niepaźbiežnaj», u Kijevie nibyta znachodziacca va ŭładzie «nacyjanalisty i nieanacysty», a ruskija ŭ Danbasie nibyta sutykajucca z «hienacydam», jaki padtrymlivajuć jeŭrapiejskija krainy.
Z aŭdytoryi ŭ chakierskija padraździaleńni
Dakumienty dazvalajuć prasačyć i dalejšy los vypusknikoŭ. Siarod 69 studentaŭ, jakija skončyli kafiedru ŭ 2024 hodzie, zhadvajecca Daniił Poršyn. Za šeść hadoŭ navučańnia jon mieŭ amal biezdakornyja adznaki i hulaŭ za futbolnuju kamandu fakulteta. Paśla vypusku jaho nakiravali ŭ Fancy Bear. Jašče 15 čałaviek z taho ž vypusku taksama atrymali pryznačeńni ŭ struktury HRU.
Adzin z vypusknikoŭ trapiŭ u vajskovuju čaść №74455 u Anapie na Čornym mory. Zachodnija śpiecsłužby ličać, što mienavita tam bazujecca viadomaja chakierskaja hrupa Sandworm.
Abviestka FBR pra vyšuk šaści ŭdzielnikaŭ padraździaleńnia HRU №74455, viadomaha pad nazvaj Sandworm, 2023 hod. Fota: FBI
Jaje źviazvajuć z hučnymi rasijskimi kibieratakami apošniaha dziesiacihodździa: uzłomam ukrainskaj enierhasistemy ŭ 2015 hodzie, atakami na štab Emanuela Makrona pierad vybarami ŭ Francyi, apieracyjami suprać zimovaj Alimpijady ŭ Paŭdniovaj Karei i sprobami sarvać rasśledavańnie atručvańnia ŭ Sołśbiery.
Pry hetym nie ŭsie studenty prachodziać adbor. U dakumientach sustrakajucca žorstkija charaktarystyki ad kurataraŭ z HRU. Adnamu z navučencaŭ, naprykład, pastavili ŭ vinu «niedastatkovaje razumieńnie taho, jak ažyćciaŭlać dystancyjnuju sietkavuju ataku».
Jak adznačajuć aŭtary, na fonie naroščvańnia Rasijaj «hibrydnych» atak na krainy Jeŭropy raskrytaja imi prahrama ŭ Baŭmanaŭskim univiersitecie vyhladaje jak častka doŭhaterminovaj dziaržaŭnaj sistemy padrychtoŭki kadraŭ dla kibiervajny. Pavodle dakumientaŭ, čarhovy nabor studentaŭ skončyć navučańnie ŭ 2027 hodzie.
Adnak surazmoŭcy žurnalistaŭ śćviardžajuć, što Baŭmanaŭski ŭniviersitet — tolki adna ź niekalkich elitnych VNU, praź jakija rasijskija śpiecsłužby adbirajuć i rychtujuć budučych chakieraŭ i raźviedčykaŭ. Jašče bolš važnuju rolu, pavodle ich słoŭ, adyhryvaje ŭniviersitet MIREA ŭ Maskvie.