«Vahnier» zavierbavaŭ ludziej u Łondanie, kab tyja vykrali rasijskaha biznesmiena Čyčvarkina. Adzin ź ich pierapisvaŭsia z «Minsk KGB»
U sakaviku 2024 hoda na ŭschodzie Łondana adbyŭsia padpał, jaki na pieršy pohlad moh zdavacca zvyčajnym złačynstvam. Ale, jak vyśvietliła śledstva, jon byŭ častkaj maštabnaj prahramy sabatažu, arhanizavanaj rasijskaj hrupaj «Vahnier» u Jeŭropie. Vyjaviŭsia i biełaruski śled.
Jak paviedamlaje The Times, u sakaviku 2023 hoda troje maładych mužčyn — 23-hadovy Džejkim Roŭz, 20-hadovy Uhnijus Asmiena i 23-hadovy Nii Miensa z paŭdniovaha Łondana — padpalili skład u pramysłovaj zonie stalicy Vialikabrytanii.
Pažar, jaki tušyli 60 pažarnych i vosiem mašyn, nanios straty prykładna na 1 miljon funtaŭ. Skład vykarystoŭvaŭsia dla zboru i adpraŭki dapamohi va Ukrainu.
Arhanizatarami złačynstva byli dva raniej sudzimyja handlary narkotykami — 20-hadovy Dyłan Erł i 23-hadovy Džejk Ryŭz. Jany byli zatrymany viasnoj minułaha hoda i sami pryznalisia śledstvu ŭ ździajśnieńni padpału na zahad PVK «Vahnier».
Jak vyśvietliła śledstva, historyja z padpałam pačałasia ŭ sakaviku 2024 hoda, kali Dyłan Erł praz Telegram pasprabavaŭ znajści mahčymaść ustupić u šerahi PVK «Vahnier».
Pad nikam «Baba Yaga» (spasyłka na vydumany vobraz kilera Džona Uika, jakoha syhraŭ Kianu Ryŭz) jon pačaŭ aktyŭna sačyć za prarasijskim kanałam Grey Zone — hałoŭnym resursam hrupy «Vahnier» pa viarboŭcy najomnikaŭ.
The Times publikuje skrynšot častki pierapiski Erła z ananimnym kantaktam u Telegram pad nikam «Minsk KGB», jakaja datavana 3 sakavika 2024 hoda.
Nieviadomy paviedamlaje anhličaninu, što źbirajecca padpisać kantrakt i pajści na vajnu. Erł u svaju čarhu prosić uziać jaho z saboju i zaŭvažaje, što «Vahnier» nie rekłamuje svajoj dziejnaści nidzie, akramia Afryki. Ale jon daŭno choča pajechać u Rasiju.
«Ty možaš dapamahčy mnie tudy trapić? I ci prymuć jany mianie, kali ja nie hramadzianin Rasii?» — pytajecca Erł.
«Bro, paśla taho, jak adsłužyš 6 miesiacaŭ, atrymaješ rasijskaje hramadzianstva», — adkazvaje Minsk KGB.
«Mnie patrebny novy pačatak», — zaŭvažaje Erł.
Ale, jak piša The Times, zamiest taho, kab pajechać u Rasiju, 20-hadovy Erł atrymaŭ instrukcyi ad kuratara z akaŭnta «Privet Bot» — zastavacca ŭ Vialikabrytanii dla praviadzieńnia dyviersij.
Pieršy zahad — padpał łondanskaha składa, jaki naležaŭ ukrainskamu biznesmienu Michaiłu Bojkavu. Jon vykarystoŭvaŭ hetyja pamiaškańni dla zboru i zachoŭvańnia humanitarnaj dapamohi dla Ukrainy, u tym liku terminałaŭ Starlink i inšych važnych materyjałaŭ, što adpraŭlalisia na front.
Pavodle źviestak, hruzaviki z dapamohaj vyjazdžali 1-2 razy na tydzień, i kožny rejs źmiaščaŭ u siarednim ad 1500 da 1800 pasyłak.
Erł daručyŭ Ryŭzu arhanizavać dyviersiju, toj u svaju čarhu zavierbavaŭ Miensa i Asmiena, a jany dałučyli da apieracyi Roŭza, asudžanaha raniej za handal narkotykami.
Apieracyja była praviedziena pozna ŭviečary 20 sakavika.
24 sakavika Erł atrymaŭ novy zahad — pravieści raźviedku dvuch restaranaŭ Hide i Hedonism Wines na zachadzie Łondana, jakija naležać rasijskamu biznesmienu Jaŭhienu Čyčvarkinu. Toj z 2008 hoda pražyvaje ŭ Vialikabrytanii, adkryta krytykuje Kreml i padtrymlivaje Ukrainu. Mužčyna nieadnarazova asabista ŭznačalvaŭ kanvoi z humanitarnaj dapamohaj Ukrainie.
Sa słoŭ Erła, apłata za vykanańnie zamovy pavinna była pastupić z Rasii. Restarany nieabchodna było spalić, a samoha Čyčvarkina vykraści i «viarnuć u Rasiju, kab jon apynuŭsia ŭ turmie».
Ale zamova tak i nie była ździejśniena. 10 krasavika Erł byŭ aryštavany. Paźniej byli zatrymany i inšyja saŭdzielniki.
Jak piša The Times, paśla vyniasieńnia prysudaŭ kiraŭnik upraŭleńnia pa baraćbie z teraryzmam (The Met's Counter Terrorism Command) Daminik Merfi zajaviŭ, što hetaja sprava źjaŭlajecca jarkim śviedčańnie taho, jak struktura, źviazanaja z rasijskaj dziaržavaj, vykarystoŭvaje «proksi» — u hetym vypadku brytanskich hramadzian — dla ździajśnieńnia surjoznych złačynstvaŭ na svajoj terytoryi.
Jon padkreśliŭ, što «kiraŭniki — Erł i Ryŭz — achvotna vystupali ŭ roli varožych ahientaŭ ad imia Rasii. (…) Usie ŭdzielniki prajavili poŭnuju abyjakavaść da mahčymych nastupstvaŭ ich dziejańniaŭ dla biaśpieki Vialikabrytanii. Kirujučysia, vidać, abiacańniem hrašovaj uznaharody, jany byli hatovyja ŭčyniać złačynstvy ad imia Rasii».
Jak paviedamlajecca, sprava Erła i jaho kampanjonaŭ — pieršy vypadak, kali śledčyja ŭžyli novy Zakon ab nacyjanalnaj biaśpiecy, pryniaty dla baraćby sa špijanažam i padryŭnoj dziejnaściu zamiežnych dziaržaŭ.
Ciapier čytajuć
Kamientary
«Ty možaš dapamahčy mnie tudy trapić? I ci prymuć jany mianie, kali ja nie hramadzianin Rasii?» — pytajecca Erł.
«Bro, paśla taho, jak adsłužyš 6 miesiacaŭ, atrymaješ rasijskaje hramadzianstva», — adkazvaje Minsk KGB.
Duračiek, s tvoim rieziumie nado było srazu prosiť u Minsk KGB biełarusskoje hraždanstvo. Možiet stał by Baboj, možiet dažie Jahoj