Rasijanie kožny kvartał nabyvajuć u Minsku 140—145 kvater. Heta mnoha ci mała?

Apošnija dva hady na rynku žylla ŭ Minsku nazirajecca źnižeńnie kolkaści ździełak, ale pry hetym košt kvadratnaha mietra praciahvaje pavolna raści. Nacyjanalnaje kadastravaje ahienctva praanalizavała, chto mienavita kuplaje kvatery ŭ stalicy i jakuju dolu zajmajuć nierezidenty.

Zdymak ilustracyjny. Fota: «Naša Niva»

Asnoŭnaja častka kupcoŭ, jak śćviardžaje NKA — heta biełarusy, i ich dola amal nie źmianiajecca: kala 94—96%. U 2022—2024 hadach na inšaziemcaŭ prypadała prykładna 5% ździełak, i hetaja ličba zastajecca stabilnaj. U 1‑m kvartale 2026 hoda biełarusy nabyli 94,4% kvater, što amal nie adroźnivajecca ad papiarednich hadoŭ.

Z 2025 hoda źmianili praviły rehistracyi sumiesnaj ułasnaści — ciapier abaviazkova paznačajucca imiony abodvuch sužencaŭ. Heta pryviało da taho, što značna vyrasła dola kvater, aformlenych na siamiejnyja pary: kali ŭ 2024 hodzie heta było tolki 2,3%, to ŭ 2025 — užo 30,1%, a ŭ 1 kvartale 2026 — bolš za pałovu (50,4%). Faktyčna kožnaja druhaja kvatera ciapier kuplajecca ŭ šlubie.

Siarod inšaziemcaŭ najbolš aktyŭnyja kupcy — hramadzianie Rasii (kala 60% usich ździełak z udziełam nierezidentaŭ). Značna radziej kuplajuć hramadzianie Litvy, Kitaja, Ukrainy i inšych krain. Usiaho ich dola vielmi nievialikaja — kala 2—5% u zaležnaści ad pieryjadu. U siarednim rasijanie nabyvajuć kala 140—145 kvater u kvartał.

Čaściej za ŭsio nierezidenty vybirajuć novyja i sučasnyja rajony Minska, naprykład «Minsk-Mir», Lebiadziny, Sucharava i inšyja kvartały novaj zabudovy.

Usiaho kvatery ŭ stalicy za apošnija hady kuplali žychary kala 65 krain, u tym liku i vielmi dalokich: Salvadora, Kaba-Verde ci Hrenady.

Jak śćviardžaje Nacyjanalnaje kadastravaje ahienctva, zamiežnyja pakupniki nie akazvajuć istotnaha ŭpłyvu na ahulnyja ceny na kvatery ŭ Minsku, bo ich dola nievialikaja i stabilnaja, a asnoŭny popyt usio adno farmirujuć biełarusy.

Kamientary da artykuła