Rasijanie zadumalisia pra pierajezd u Biełaruś. Čamu dla ich tut tak miodam namazana?

Adkul šum?

Nadvorje palepšała, sonca pačało pryhravać, i rasijanie tradycyjna paciahnulisia ŭ Minsk pahulać pa staličnych praśpiektach, pajeści stravy biełaruskaj kuchni i pašopicca ŭ mas-markiecie. Zvyčajna ŭsio na hetym i zakančvałasia, ale ŭ biahučym hodzie našy susiedzi ŭbačyli ŭ Biełarusi nie tolki turystyčny patencyjał, a i pierśpiektyvu dla pierajezdu i pastajannaha žyćcia.

U Threads pačali źjaŭlacca adzinkavyja pasty pra heta. Potym takich pastoŭ rabiłasia ŭsio bolš… Dalej ža kalektyŭnaje nieśviadomaje ŭžo było nie spynić. Padobnyja pasty zapoŭnili sacsietki.

Niekatoryja ź ich nabrali sotni kamientaryjaŭ biełarusaŭ. Jość pazityŭnyja, jość i tyja, u jakich nie vidać radaści nakont takoj uvahi z boku susiedziaŭ. Miarkujučy pa paviedamleńniach, niekatoryja žychary Minska aścierahajucca, što napłyŭ rasijan padymie i biez taho vysokija ceny na nieruchomaść.

Što kažuć rasijanie?

«Anłajnier» źviazaŭsia z rasijanami, jakija pisali pasty pra mierkavany pierajezd. Jany paćvierdzili svaje płany i achvotna padzialilisia padrabiaznaściami. Cikava, što śpikiery vybiralisia randomna, ale amal usie jany i nie dumajuć kuplać nieruchomaść u Minsku. Havorka idzie tolki pra arendu.

Safija žyvie ŭ Maskvie. Jana razhladaje roznyja krainy dla pierajezdu, ale, pavodle jaje słoŭ, samym dastupnym varyjantam zaraz źjaŭlajecca Biełaruś.

«Kolki b kamientaryjaŭ u styli «zastavajciesia ŭ svajoj krainie» pad tym pastom mnie ni napisali, ja ŭpeŭnienaja, što dobryja i pryhožyja ludzi ŭ Biełarusi jość. Čamu Biełaruś? Biełaruskaja mova nie składanaja dla vyvučeńnia, plus i pa-rusku mianie zaŭsiody zrazumiejuć. Taksama, miarkujučy pa kamientaryjach, ludzi tam davoli achajnyja. Pakul nie mahu dać dakładny adkaz, jakuju mienavita nieruchomaść my budziem razhladać. Viadoma, kali hladzieć nie ŭ centry Minska, to dla rasijskaha zarobku ceny vielmi navat prymalnyja. Adnak, nakolki ja vyśvietliła, kali pracavać u RB, budzie składaniej».

Volha taksama žyvie ŭ Maskvie, adnak, pavodle jaje słoŭ, maje hramadzianstva ES. Minsk jana razhladaje tolki dla časovaha znachodžańnia.

«Ja źbirajusia pierajechać u Minsk na 4—6 miesiacaŭ, da vosieni. U mianie hramadzianstva ES, dalej ja ŭ Litvu płanuju źjechać. Tamu pierajezd da vas ja razhladaju ŭsurjoz, ale tolki na peŭny čas. U pierśpiektyvie mnie vielmi važnyja padarožžy i pramyja rejsy pa Jeŭropie, a taksama mahčymaść raźvivać biznes tam.

Mianie pryciahvaje ŭ RB toje, što ŭ mianie ŭ Minsku siabry (heta samaje hałoŭnaje). U cełym u Biełarusi vydatnyja ludzi, lohkaja adaptacyja, dobraja jakaść i dastupnaść miedycyny. U mianie praca źviazanaja sa štučnym intelektam, usia jana prachodzić anłajn. Nieruchomaść nie źbirajusia kuplać, a zdymać žyllo hatovaja pa canie arendy majoj kvatery ŭ Maskvie — heta $600—700. Zaraz šukaju varyjanty praź siabroŭ».

Safii 18 hadoŭ. Jany z maładym čałaviekam razhladajuć pierajezd ź Jekaciarynburha ŭ Minsk.

«Nastrojenyja nastolki surjozna, što ŭ krasaviku pajedziem na tydzień u Minsk. Pahladzim usio svaimi vačami. Vielmi chočacca ŭ vas pabyvać, cikava, jakija pradukty jość na palicach, jakija ceny. Viadoma, płanujem pašarycca pa ŭsich mas-markietach! Tyja ž kramy cikavyja, tvorčaść. Nu i ŭ mianie tam žyvuć svajaki, nie blizkija, ale ŭsio roŭna. Toje, što jany raskazvali pra vašu krainu, vielmi nas pryciahvaje!

Načutyja pra čyściniu ŭ mnohich haradach, dahledžanyja miescy adpačynku, vietlivych i spahadlivych ludziej, miascovyja brendy — ad kaśmietyki i adzieńnia da prysmakaŭ i kaŭbas. Vielmi chočam usio pasprabavać i pahladzieć!

Pra nieruchomaść mnie składaniej kazać. Zdajecca, što ŭ Minsku žyllo budzie kaštavać mocna daražej, čym u nas. Zaraz my z maładym čałaviekam i sabakam zdymajem dvuchuzroŭnievuju kvateru za 40 tysiač rasijskich rubloŭ ($495) u ahulnaj sumie. A voś u stalicy Biełarusi, Minsku, dzie b nam i chaciełasia asieści, takaja ž kvatera budzie abychodzicca ŭ 50—70 tysiač ($620—860). Pakul adkazna da pošuku kvatery nie padychodzili, bo chočacca spačatku pryjechać turystami».

Kacia žyvie ŭ Vałhahradzie. Jana ŭžo vyvučała varyjanty dla žyćcia ŭ Biełarusi. Što charakterna, dziaŭčynu cikavić nie Minsk, a maleńkija harady.

«Tak, užo šukała varyjanty pražyvańnia, paraŭnoŭvała ceny, vyvučała, jakija nieabchodnyja dakumienty dla žyćcia ŭ RB. Maja mama nie raz naviedvała Biełaruś i vielmi chvaliła vašu krainu. Joj padabałasia staŭleńnie ludziej, jakaść tavaraŭ i praduktaŭ, ceny. U vas kiroŭcy vykonvajuć PDR, u adroźnieńnie ad našych nieadekvatnych. A jašče jana časta kazała mnie: «Pasprabujcie pierajechać tudy, tam dobra».

Kali my havorym pra kuplu žylla, to pra heta ja nie zadumvałasia. A voś na arendu ceny sapraŭdy nižejšyja, čym u Vałhahradzie. Moj horad — jon maleńki (1 młn žycharoŭ), ale ŭzroŭni zarobkaŭ i košt žyćcia tut naohuł nieparaŭnalnyja. Arenda 2‑pakajovaj kvatery nam abychodzicca ŭ 30—35 tysiač rubloŭ ($370—430). A voś ceny na žyllo ŭ nievialikich biełaruskich haradach radujuć. Było b kruta źniać štości ŭ rajonie 20 000 rubloŭ ($250)».

Ekśpiert: «Dola pakupnikoŭ-rasijan moža vyraści da 10%»

Svaju pazicyju nakont ažyjatažu ź pierajezdam vykazała ekśpiert rynku nieruchomaści i aŭtarka telehram-kanała «Litovskaja o žilje» Natalla Litoŭskaja:

«U sacsietkach rasijanam, jakija zadumalisia pra pierajezd, našy suhramadzianie nahadvajuć, što zarobki ŭ nas nižejšyja, mientalitet adroźnivajecca, i, kab upisacca ŭ hramadstva, varta pačynać vučyć biełaruskuju movu. I tak, sapraŭdy, usio bolš rasijan razhladajuć varyjant kupli kvatery ŭ Minsku. Cikaviacca jany albo kamfortnymi novabudoŭlami, albo druhasnym žyllom kamfort-kłasa.

Pakul dola zamiežnikaŭ — usio tyja ž 3—4%. Rełakacyi niama. Ale moža zdarycca, što dola pakupnikoŭ-rasijan vyraście letam da 10%. Heta toj fors-mažor, da jakoha hramadzianie, jakija čakajuć źnižeńnia cen, maralna nie hatovyja. Prytok ludziej z «žyvymi» hrašyma moža padkinuć paliva ŭ topku staličnych cen. I navat nievialikaja devalvacyja heta nie nivieluje».

• 1
• 0
• 0
• 3
• 3
• 0
• 12
• 0