Jašče adna mižnarodnaja fiederacyja źniała abmiežavańni ź biełarusaŭ
Mižnarodny sajuz sučasnaha piaciborja (UIPM) źniaŭ usie abmiežavańni dla biełaruskich spartsmienaŭ i kamandaŭ. Takoje rašeńnie arhanizacyja pryniała paśla novaj rekamiendacyi Mižnarodnaha alimpijskaha kamiteta.
Fota ilustracynaje
Z nastupnaha tydnia biełaruskija atlety zmohuć udzielničać u turnirach UIPM pad čyrvona-zialonym ściaham, a taksama ź dziaržaŭnymi hierbam i himnam krainy. Taksama zbornyja Biełarusi atrymajuć prava aficyjna pradstaŭlać svaju dziaržavu na mižnarodnych spabornictvach.
Da hetaha, paśla rašeńnia MAK u 2023 hodzie, biełaruskija spartoŭcy vystupali tolki ŭ niejtralnym statusie — bieź dziaržaŭnaj simvoliki.
Novyja praviły pačnuć dziejničać adrazu i buduć raspaŭsiudžvacca na ŭsie turniry UIPM, za vyklučeńniem bližejšaha etapa Kubka śvietu ŭ bałharskim Pazardžyku. Pieršaje bujnoje spabornictva, dzie biełarusy zmohuć vystupić užo biez abmiežavańniaŭ, — Kubak śvietu ŭ Budapiešcie ŭ červieni 2026 hoda.
Pry hetym dla rasijskich spartoŭcaŭ niejtralny status pakul zastajecca ŭ sile.
Sučasnaje piaciborje stała jašče adnym vidam sportu, dzie mižnarodnyja arhanizacyi pastupova viartajuć biełaruskim atletam poŭny ŭdzieł u mižnarodnych spabornictvach. Raniej padobnyja rašeńni ŭžo prymalisia ŭ vodnych vidach sportu, handbole i inšych dyscyplinach.
Čytajcie taksama:
Mižnarodnyja fiederacyi lohkaj atletyki i tenisa pakul nie buduć zdymać abmiežavańni ź biełarusaŭ
Biełaruskaha pryziora Alimpijady ŭ Paryžy złavili na dopinhu
MAK źniaŭ usie abmiežavańni ź biełaruskich spartsmienaŭ. Z rasijskich — nie