U Pakistanie ŭzarvali bombu na bazary, dzieviać zahinułych

Na paŭnočnym zachadzie Pakistana adbyŭsia vybuch bomby, zamacavanaj na rykšy. U vyniku zahinuli jak minimum dzieviać čałaviek, jašče bolš za dva dziasiatki atrymali ranieńni, paviedamlaje Euronews.

Fota: AP Photo / Farhat Ullah

Incydent adbyŭsia na rynku ŭ rajonie Łaki Marvat pravincyi Chajbier-Pachtunchva, niedaloka ad miažy z Afhanistanam. Pa infarmacyi palicyi, siarod zahinułych — dvoje supracoŭnikaŭ darožnaj palicyi i adna žančyna. Miarkujecca, što metaj ataki byli mienavita siłaviki.

Padčas vybuchu taksama byli paškodžanyja kramy i inšyja abjekty pobač. Bolšaść paciarpiełych — vypadkovyja minaki.

Nivodnaja hrupoŭka pakul nie ŭziała na siabie adkaznaść za napad. Adnak padazreńni časta padajuć na pakistanski «Taliban» — hrupoŭku «Techryk-je Taliban Pakistan», jakaja apošnija hady aktyvizavała ataki suprać siłavikoŭ.

Pry hetym pradstaŭniki pakistanskich talibaŭ užo zajavili, što nie majuć dačynieńnia da vybuchu.

Premjer-ministr Pakistana Šachbaz Šaryf asudziŭ napad i vykazaŭ spačuvańni siemjam zahinułych. Jon daručyŭ chutka pravieści rasśledavańnie i znajści vinavatych.

Situacyja ź biaśpiekaj u rehijonie zastajecca napružanaj paśla taho, jak u 2021 hodzie ŭładu ŭ Afhanistanie znoŭ zachapili taliby. Pamiž Pakistanam i Afhanistanam praciahvajucca ŭzajemnyja abvinavačańni ŭ padtrymcy bajevikoŭ, a na miažy pieryjadyčna adbyvajucca sutyknieńni.

Kamientary da artykuła