U Pakistanie ździejśnili terakt u miačeci, zahinuli bolš za 30 čałaviek
U vyniku terakta ŭ šyickaj miačeci na ŭskrainie Isłamabada, stalicy Pakistana, zahinuli nie mienš za 31 čałaviek, jašče jak minimum 169 atrymali ranieńni. Vybuch adbyŭsia padčas piatničnaj malitvy, kali teraryst-śmiarotnik pryvioŭ u dziejańnie vybuchovaje prystasavańnie, paviedamlaje Euronews.
Pa słovach ministra abarony Pakistana Chadžy Asifa, achova miačeci sprabavała zatrymać padazravanaha, adnak jon adkryŭ ahoń, a zatym padarvaŭ siabie. Čynoŭnik taksama zajaviŭ, što napadnik časta jeździŭ pamiž Pakistanam i Afhanistanam.
Kolkaść achviar moža pavialičycca, bo častka paciarpiełych znachodzicca ŭ krytyčnym stanie. Na videakadrach bačna, jak palicyja i miascovyja žychary dastaŭlajuć paranienych u najbližejšyja balnicy.
Pakul nivodnaja hrupoŭka nie ŭziała na siabie adkaznaść za napad. Adnak siarod mahčymych vinavatych nazyvajuć pakistanskich talibaŭ i miascovaje adździaleńnie hrupoŭki «Isłamskaja dziaržava», jakija ŭžo raniej ździajśniali napady na šyickich viernikaŭ, što źjaŭlajucca mienšaściu ŭ krainie.
Apošnim časam u Pakistanie nazirajecca rost ekstremisckaha hvałtu, jaki ŭ asnoŭnym źviazvajuć ź biełudžskimi sieparatystami i rucham «Techryk-je-Taliban Pakistan». Akramia taho, ŭ krainie aktyŭna dziejničaje rehijanalnaja struktura «Isłamskaj dziaržavy». Choć u Isłamabadzie padobnyja napady zdarajucca radziej, hučnyja terakty ŭžo mieli miesca i raniej.
Prezident Pakistana Asif Ali Zardary i premjer-ministr Šachbaz Šaryf asudzili napad, nazvaŭšy jaho złačynstvam suprać čałaviečnaści, i vykazali spačuvańni siemjam zahinułych. Jany daručyli zabiaśpiečyć usiu nieabchodnuju miedycynskuju dapamohu paranienym i pravieści poŭnaje rasśledavańnie.
Šyicki lidar Radža Nasir taksama asudziŭ napad, zajaviŭšy, što taki terakt u stalicy śviedčyć pra surjoznyja prablemy ŭ sistemie biaśpieki. Jon zaklikaŭ hramadzian zdavać kroŭ, bo ŭ balnicach Isłamabada vostra nie chapaje donarskich zapasaŭ.
Najbujniejšy terakt u Isłamabadzie da hetaha adbyŭsia ŭ 2008 hodzie, kali vybuch u hateli Marriott zabraŭ žyćci 63 čałaviek. U listapadzie 2025 hoda teraryst-śmiarotnik padarvaŭsia kala budynka suda, u vyniku čaho zahinuli 12 čałaviek.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj30
Kamientary