«Kropkava budziem admabilizoŭvać čaści dla taho, kab rychtavać ich da vajny». Łukašenka anansavaŭ źmieny ŭ vojsku
Alaksandr Łukašenka 12 maja pravioŭ sustreču ź ministram abarony Viktaram Chreninym, hałoŭnaj temaj jakoj stali kadravyja pytańni ŭ vojsku i vyniki niadaŭniaj pravierki bajavoj hatoŭnaści armii, piša BiełTA.
Alaksandr Łukašenka i Viktar Chrenin. Fota: BiełTA
Łukašenka adznačyŭ, što efiektyŭnaść słužby šmat u čym zaležyć ad kankretnych ludziej na kiraŭničych pasadach. Na jaho dumku, kali na miescy znachodzicca «pravilny čałaviek», situacyja ŭ padraździaleńni budzie narmalnaj, a kali nie — mohuć uźniknuć prablemy. U suviazi z hetym jon daručyŭ ministru abarony praanalizavać skład kamandnych kadraŭ i padrychtavać prapanovy.
Taksama abmiarkoŭvali vyniki maštabnaj pravierki Uzbrojenych sił.
«Vy tam raźbiralisia: dzieści pryncypova, a dzieści tak… Ja čakaŭ, kali vy sami tam raźbieraciesia ŭ dobrych rečach i niedachopach (ich zaŭsiody chapaje). Ale my asabliva i nie chavali tyja niedachopy, jakija byvajuć u armii. Ja vyrašyŭ, što nam chavać hetyja niedachopy nie treba, ale i napakaz my ich asabliva nie vystaŭlali», — zajaviŭ Łukašenka, adznačyŭšy, što nibyta «my heta bolš adkryta rabili, čym kiraŭnictva inšych krain».
Taksama jon skazaŭ, što Biełaruś zastajecca mirnaj krainaj, ale armija pavinna być hatovaja da lubych scenaryjaŭ:
«Dalej, jak ja abiacaŭ, my kropkava budziem admabilizoŭvać čaści dla taho, kab rychtavać ich da vajny. Daj boh, kab jaje ŭdałosia paźbiehnuć».
Viktar Chrenin paśla sustrečy paviedamiŭ, što pravierki pakazali ŭ cełym dobruju hatoŭnaść asabovaha składu, a kančatkovyja kadravyja rašeńni budzie prymać Łukašenka na padstavie prapanoŭ vajskovaha viedamstva.