U Minsku pradajuć bukiet bezu za 116 rubloŭ. I heta sa źnižkaj

Bez nielha łamać na vulicy (inakš štraf), ale možna nabyć u kvietkavaj kramie. Žurnalistka vydańnia Myfin, adnak, zaŭvažyła, što ceny na hetyja kvietki nie takija i biudžetnyja. Naprykład, krama «Vals kvietak» prapanuje bukiet bezu za 116 BYN. Miarkujučy pa prapanovach inšych kram, heta zvyčajnaja cana.

Fota: płatforma Flowwow, minskaja krama «Vals kvietak»

«Dafaminavy bukiet z bezu», jak jaho nazvali, składajecca z 11 vysokich 50‑santymietrovych halinak, upryhožanych dyzajnierskaj upakoŭkaj. Kali «na kalency» paličyć košt adnoj halinki bezu, vychodzić kala 10 BYN.

Miarkujučy pa vodhukach da bukieta, zakazy jość, klijenty zadavolenyja: staviać 5 bałaŭ z 5 maksimalnych.

Minskaja krama LaRose pradaje bez biez upakoŭki: 5 halinak za 39,77. Paznačana, što bukiet «sabrany siońnia i hatovy da dastaŭki». Kali ŭ papiarednim bukiecie vyšynia halinki 50 sm, to tut — užo 29 sm.

Taksama žurnalisty ŭbačyli abjavu ab prodažy bezu paštučna: pa 10 BYN za halinku.

Pradaviec źviartaje ŭvahu: siezon bezu vielmi karotki.

Žurnalist Myfin źviazaŭsia z adnoj z kram z prośbaj rastłumačyć, čamu bez taki darahi. Voś jaki kamientaryj my atrymali:

«My zakuplajem bez u miascovych fiermieraŭ, što dazvalaje padtrymlivać biełaruskich vytvorcaŭ i atrymlivać śviežuju kvietku. Cana ŭ 10 rubloŭ za halinku ŭklučaje bieražlivuju dastaŭku, zachavańnie, pracu fłarystaŭ i ŭpakoŭku, kab pakupniki atrymali bez u najlepšym vyhladzie. Dla paraŭnańnia, impartny bez z Hałandyi kaštuje amal u dva razy daražej (i heta tolki ŭ zakupcy), plus dastaŭka z Hałandyi našmat składaniejšaja i bolš doŭhaja pa terminach».

Nałamać bezu samomu, prynamsi ŭ hramadskich miescach, moža abyścisia jašče daražej. Pra heta niadaŭna papiaredziła Minpryrody. 

Kamientary da artykuła