U Minsku ŭ 2026 hodzie płanujuć značna pašyryć azielanieńnie horada. Pra heta paviedamiła kiraŭnica słužby pa ŭparadkavańni pradpryjemstva «Minskzialonbud» Natalla Lisoŭskaja.
Viasnoj u stalicy źbirajucca vysadzić bolš za 10 tysiač dreŭ i kala 50 tysiač kustoŭ. Asnoŭnuju ŭvahu nadaduć azielanieńniu ŭzdoŭž haradskich vulic i Minskaj kalcavoj darohi. Vosieńniu płanujecca dadatkova pasadzić prykładna 100 tysiač kustoŭ, ale kančatkovyja płany vyznačać paśla abśledavańnia zialonych nasadžeńniaŭ paśla zimy.
U horadzie buduć šyroka vykarystoŭvacca roznyja dekaratyŭnyja kusty — u tym liku bez, hartenzija, viajhieła, śpireja i kizilnik.
Asobnaja ŭvaha nadajecca kvietkavamu afarmleńniu. Usiaho ŭ Minsku vysadziać kala 1,26 miljona adnahadovych kvietak. Siarod najbolš papularnych — biahonija, cynieraryja, piatunija, tahietes, koleusy i piełarhonija. Akramia taho, płanujecca pasadzić kala 100 tysiač šmathadovych raślin. Taksama ŭ roznych rajonach horada źjavicca kala 50 tysiač kustoŭ ruž, u tym liku minijaciurnyja sarty ŭ viertykalnych kanstrukcyjach.
Praciahniecca i vykarystańnie padviasnych kašpo z kvietkami ŭzdoŭž daroh. U minułym hodzie takija kampazicyi z marozaŭstojlivymi raślinami ŭpieršyniu źjavilisia na praśpiekcie Pieramožcaŭ i dobra siabie zaśviedčyli. Tamu ciapier ich płanujuć ustalavać i ŭ inšych častkach horada — na praśpiektach Dziaržynskaha i Partyzanskim, a taksama na vulicach Arłoŭskaj, Prytyckaha i inšych mahistralach. Usiaho raźmieściać kala 8 tysiač kašpo.
U mai na aharodžach uzdoŭž raździalalnych pałos źjavicca kala 17 tysiač kašpo ź letnimi ampielnymi kvietkami, naprykład piatunijami i ipamiejaj. Uvosień ich zamieniać na chryzantemy, dla jakich płanujuć ustalavać bolš za 12 tysiač śpiecyjalnych skrynak.
Akramia taho, u horadzie źjaviacca novyja małyja architekturnyja formy. Ich ustalujuć, u pryvatnaści, uzdoŭž praśpiekta Pieramožcaŭ, u skviery kala Pałaca sportu i ŭ inšych važnych miescach stalicy.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma11
Kamientary