Zialenski: Maskva sprabuje ŭciahnuć Minsk u vajnu suprać Ukrainy albo apieracyju suprać krainy NATA
Prezident Ukrainy Uładzimir Zialenski pa vynikach narady z kiraŭnikami Hienštaba USU, Hałoŭnaha ŭpraŭleńnia raźviedki Ministerstva abarony, SBU i Słužby źniešniaj raźviedki Ukrainy zrabiŭ niekalki zajaŭ, u jakich zhadaŭ i Biełaruś.
Uładzimir Zialenski. Fota: Byron Smith/Getty Images
«Praciahvajem fiksavać sproby Rasii jašče bolš uciahnuć Biełaruś u vajnu suprać Ukrainy. Viedajem, što adbylisia dadatkovyja kantakty pamiž rasijanami i Alaksandram Łukašenkam, meta jakich — pierakanać jaho dałučycca da novych ahresiŭnych apieracyj Rasii. U pryvatnaści, Rasija razhladaje płany apieracyj u napramku na poŭdzień i na poŭnač ad terytoryi Biełarusi — albo suprać Čarnihaŭska-Kijeŭskaha kirunku va Ukrainie, albo suprać adnoj z krain NATA — mienavita z terytoryi Biełarusi. Ukraina vałodaje detalami razmovy pamiž Rasijaj i Biełaruśsiu», — śćviardžaje Zialenski.
Taksama jon raskazaŭ, što abmiarkoŭvalisia dziejańni Ukrainy ŭ adkaz na rasijskija ŭdary, jakija zabirajuć žyćci ludziej.
«My spraviadliva adkazvajem pa rasijskaj naftavaj pramysłovaści, vajskovaj vytvorčaści i pa tych asobach, jakija niepasredna ździajśniajuć vajennyja złačynstvy suprać Ukrainy i ŭkraincaŭ», — adznačyŭ Zialenski.
Akramia taho, prezident Ukrainy padkreśliŭ, što śpiecyjalisty HUR «atrymali dakumienty, jakija śviedčać pra padrychtoŭku rasijanami novych rakietna-dronavych udaraŭ pa Ukrainie, u pryvatnaści, jak jany ŭkazvajuć, pa «centrach pryniaćcia rašeńniaŭ».
Zialenski nie abmiežavaŭsia słovami i vykłaŭ taksama kopii niekatorych zdabytych raźviedkaj dakumientaŭ.
Čytajcie taksama:
Ukraina pryznačyła adkaznaha za supracoŭnictva ź Biełaruśsiu