Były pałac Radziviłaŭ u Dziatłavie za 90 rubloŭ nabyła rasijanka

Były pałac Radziviłaŭ u Dziatłavie, jaki doŭhi čas stajaŭ zakinutym, narešcie znajšoŭ novaha ŭładalnika. Jaho pradali na aŭkcyjonie za simvaličnuju sumu — 90 rubloŭ. Pakupnicaj stała rasijanka Taćciana, jakaja ciapier žyvie ŭ Minsku, piša Sputnik.

Fota: Dźmitryj Markaŭ / Sputnik

Rasijanka pryznałasia, što mieć ułasny pałac było jaje dziciačaj maraj, i ciapier jana choča nie prosta vałodać hetym budynkam, a adnavić jaho i zrabić dastupnym dla ludziej.

Hety pałac maje doŭhuju i nie da kanca vyvučanuju historyju. Ličycca, što kamienny budynak uźviali prykładna ŭ 1751 hodzie pradstaŭniki rodu Radziviłaŭ, mahčyma, z udziełam italjanskaha architektara. Ale isnujuć i inšyja viersii, pavodle jakich jašče ŭ XV stahodździ na hetym miescy ŭžo stajaŭ pałac abo ŭmacavańnie, źviazanaje ź inšymi šlachieckimi rodami. U roznyja časy budynak pierabudoŭvaŭsia, źmianiaŭ uładalnikaŭ i pieražyvaŭ razbureńni. Naprykład, padčas vojnaŭ jon mocna paciarpieŭ, a paśla paŭstańnia 1830—1831 hadoŭ byŭ kanfiskavany va ŭładalnikaŭ.

Pałac u Dziatłavie na hraviury Napaleona Ordy

Ź ciaham času pałac straciŭ svajo pieršapačatkovaje značeńnie i vykarystoŭvaŭsia dla roznych patreb: tam raźmiaščalisia škoła, balnica, vajskovy špital, prytułak, a paźniej — haradskaja stamatałohija, jakaja pracavała tam da 2010 hoda. Paśla hetaha budynak apuścieŭ i pačaŭ pastupova razburacca.

Fota: Dźmitryj Markaŭ / Sputnik

Pałac nieadnarazova sprabavali pradać, pačynajučy z 2015 hoda, ale doŭhi čas nie znachodziłasia pakupnikoŭ. Adzin z papiarednich uładalnikaŭ — taksama, darečy, rasijanin, — u 2022 hodzie nabyŭ jaho za nievialikija hrošy, ale nie vykanaŭ abaviazańniaŭ restaŭracyi, i budynak viarnuli dziaržavie. U vyniku jaho znoŭ vystavili na tarhi, dzie rasijanka Taćciana była adzinaj udzielnicaj.

Novaja ŭładalnica pałaca daje intervju. Fota: Dźmitryj Markaŭ / Sputnik

Razam z kuplaj pałaca jana ŭziała na siabie šerah abaviazkaŭ pierad dziaržavaj: nieabchodna zachavać pomnik i na praciahu piaci hadoŭ uvieści jaho ŭ ekspłuatacyju. Pry hetym adnaŭleńnie patrabuje značnych srodkaŭ i ŭdziełu śpiecyjalistaŭ, bo havorka idzie pra histaryka-kulturnuju kaštoŭnaść.

Pieršapačatkova novaja ŭładalnica płanuje adramantavać častku budynka — uvachod, kalidor i adnu z załaŭ — kab adkryć ich dla naviedvalnikaŭ. Ekskursii buduć pravodzicca sumiesna ź miascovym muziejem. Paralelna buduć vieścisia restaŭracyjnyja raboty.

Fota: Dźmitryj Markaŭ / Sputnik

Paśla Taćciana razhladaje roznyja varyjanty vykarystańnia pałaca: stvareńnie kaviarni, nievialikaha hatela, vystavačnych załaŭ, arhanizacyju ekskursij i interaktyŭnych mierapryjemstvaŭ. Jość idei vykarystać sutareńni pad dehustacyjnyja prastory abo kuchniu, a taksama ŭparadkavać terytoryju vakoł — pasadzić sad, pastavić altanki i pravodzić tam mierapryjemstvy, naprykład viasielnyja cyrymonii.

Staradaŭni kamin i plitačnaja padłoha — adzinaje, što zastałosia ŭnutry pałaca ad aryhinalnaha ŭnutranaha azdableńnia. Fota: Dźmitryj Markaŭ / Sputnik

Jana taksama nie vyklučaje, što ŭ budučyni zmoža žyć u častcy pałaca. Uvohule, pa jaje słovach, jana ŭsprymaje hety prajekt jak asabistuju misiju — viarnuć da žyćcia histaryčny abjekt i zrabić jaho karysnym i cikavym dla ludziej.

Kamientary da artykuła