Palak chacieŭ trapić u Biełaruś, pieralezšy cieraz płot u Litvie
Litoŭskija pamiežniki zatrymali hramadzianina Polščy kala miažy ź Biełaruśsiu. Jak śćviardžaje Słužba achovy dziaržaŭnaj miažy Litvy, jon sprabavaŭ niezakonna pierajści dziaržaŭnuju miažu.
Fota: vsat.lrv.lt
Incydent adbyŭsia niedaloka ad Druskienikaŭ, prykładna za 200 mietraŭ ad miažy. Pamiežniki vyjavili mužčynu z dapamohaj techničnych srodkaŭ nazirańnia i apieratyŭna vyjechali na miesca. Tam jany zatrymali 44‑hadovaha hramadzianina Polščy.
Pry sabie mužčyna mieŭ samarobnyja drabiny, jakija, jak miarkujecca, źbiraŭsia vykarystać, kab pieraadoleć inžyniernyja zaharody na miažy. Taksama ŭ jaho byli rovar, spalny miašok, instrumienty i asabistyja rečy.
Fota: vsat.lrv.lt
Asobna adznačajecca, što ŭ rečach palaka znajšli kanvierty z hatoŭkaj — dalarami ZŠA i polskimi złotymi. Ahulnaja suma aceńvajecca amal na 60 tysiač jeŭra.
Zatrymany patłumačyŭ, što jon nibyta płanavaŭ pierabracca cieraz aharodžu i trapić na terytoryju Biełarusi. Adnak dakładnyja matyvy jaho dziejańniaŭ aficyjna nie raskryvajucca.
Pamiežnaja słužba Litvy pačała kryminalnuju spravu pa fakcie sproby niezakonnaha pierasiačeńnia miažy i mahčymaj kantrabandy hrošaj. Sud abraŭ mužčynu mieru strymańnia ŭ vyhladzie aryštu na adzin miesiac.
Čytajcie taksama:
Historyja dziaržSMI pra «abstreł» biełarusa ŭ Polščy vyklikała burny śmiech u sacsietkach
Dastali. Mytniki zaprasili mužčynu na asabisty nadhlad — toj aburyŭsia i raździeŭsia dahała
«Kali spyniacca dopyty?» Pamiežny kamitet prapanavaŭ u Threads źviartacca z pytańniami