Biełaruski vytvorca kaśmietyki nabyŭ zavod u Rasii

Biełaruskaja kampanija Flario Group, jakaja vypuskaje kaśmietyku pad brendami Tashe, Flario i Limba, nabyła zavod u rasijskim Padolsku, paviedamlaje Office Life. Pra heta kampanija paviedamiła praz svaje sacsietki.

Fota: Flario Group

Pavodle danych kampanii, jaje vytvorčaść užo dasiahnuła vialikich abjomaŭ — kala 12 miljonaŭ adzinak pradukcyi na hod, a składskija płoščy zajmajuć bolš za 2,5 tysiačy kvadratnych mietraŭ. Adnak popyt na pradukcyju vyras i vytvorčych mahutnaściaŭ stała nie chapać, tamu było pryniata rašeńnie pra pašyreńnie.

Novy zavod u Rasii abrali mienavita ŭ Padolsku tamu, što tam znajšli adpaviednaje vialikaje pamiaškańnie, a taksama praz zručnuju łahistyku — pobač znachodziacca raźmierkavalnyja centry bujnych markietpłejsaŭ.

Zapusk vytvorčaści na novym abjekcie płanujecca ŭžo da 1 žniŭnia.

Kampanija adznačajecca tym, što adkryta pakazvaje praces vytvorčaści kaśmietyki ŭ realnym časie — ad źmiešvańnia inhredyjentaŭ da ŭpakoŭki hatovaj pradukcyi. Brendy kampanii pradstaŭlenyja ŭ bujnych handlovych centrach Minska i Hrodna.

Uvohule biełaruskija kaśmietyčnyja brendy davoli papularnyja ŭ Rasii, asabliva ŭ siehmiencie srodkaŭ dla vałasoŭ, dzie jany zajmajuć adno ź viadučych miescaŭ.

Kamientary da artykuła