Što Rasija bambiła balistyčnym «Arešnikam» u Biełaj Carkvie?
U noč na 24 maja rasijskija vojski nanieśli masiravany ŭdar pa Ukrainie, prymianiŭšy balistyčnuju rakietu «Arešnik». Na hety raz pad udar hipierhukavoj zbroi patrapiŭ horad Biełaja Carkva, raźmieščany za 70 kiłamietraŭ na poŭdzień ad Kijeva.
Haražy, što hareli ŭ Biełaj Carkvie
Pavodle źviestak ukrainskaha kamandavańnia VPS, rakieta była zapuščana z palihona Kapuścin Jar u Astrachanskaj vobłaści.
Rasija zajaviła, što ŭsie celi byli paražony. Što ž RF atakavała ŭ Biełaj Carkvie?
Ukrainskija ratavalniki a 7 ranku paviedamili, što ŭ Biełaj Carkvie hareli try haražy.
Prakuratura Kijeŭskaj vobłaści napisała, što ŭ Biełacarkoŭskim rajonie paškodžany haražny kaapieratyŭ i budynki cyvilnaha pradpryjemstva.
Rasijskija kanały śćviardžajuć, što ŭdar byŭ naniesieny pa aeradromie. Dokazaŭ hetamu nie pryvodzicca, i paćvierdžańniaŭ pakul niama.
Heta ŭžo treci vypadak prymianieńnia Rasijaj rakietnaha kompleksu «Arešnik». Raniej RF udaryła ŭ listapadzie 2024 hoda pa zavodzie «Južmaš», u studzieni 2026 hoda — pa Lvovie.
Pryncyp dziejańnia «Arešnika», stvoranaha na bazie prajekta RS-26 «Rubiež», zaklučajecca ŭ padziele hałaŭnoj častki na 6 asobnych błokaŭ, kožny ź jakich vypuskaje jašče pa 6 subbojeprypasaŭ.
U vyniku na cel adnačasova abrušvajucca 36 udarnych elemientaŭ.
Pakolki rakieta vykarystoŭvałasia ŭ niejadziernym varyjancie, razbureńni vyklikany vielizarnaj kinietyčnaj siłaj padzieńnia pustych mietaličnych bałvanak na chutkaści zvyš 12 000 km/h, jakuju praktyčna niemahčyma pierachapić sučasnymi sistemami SPA.
Minabarony RF nazvała hetuju ataku «ŭdaram adpłaty». Prezident Ukrainy Uładzimir Zialenski žorstka adreahavaŭ na zdareńnie, nazvaŭšy rasijskaje kiraŭnictva nieadekvatnym za vykarystańnie stratehičnaha ŭzbrajeńnia suprać škoł i abjektaŭ vodazabieśpiačeńnia, i padkreśliŭ, što takija dziejańni Kramla nie pavinny zastacca biez nastupstvaŭ z boku mižnarodnaj supolnaści.
Načnaja ataka, u jakoj akramia «Arešnika» byli zadziejničany jašče 89 rakiet inšych typaŭ i 600 dronaŭ, zabrała žyćci dvuch čałaviek u Kijevie, bolš za 50 žycharoŭ stalicy atrymali ranieńni.