Kitaj z dapamohaj štučnaha intelektu pieratvaraje svaju sistemu nazirańnia ŭ instrumient «prahnastyčnaha» kantrolu

Kitaj raspačaŭ maštabnuju madernizacyju svajoj sistemy tatalnaha nazirańnia, jakaja ličycca najbujniejšaj u śviecie, ukaraniajučy ŭ jaje pieradavyja technałohii štučnaha intelektu. Heta dazvalaje dziaržavie pierajści na novy ŭzrovień kantrolu: ad prostaj fiksacyi padziej da aŭtamatyzavanaha sačeńnia, analizu pavodzin i prahnazavańnia patencyjnych «biesparadkaŭ» u režymie realnaha času. Z padrabiaznaściami znajomić Financial Times.

Kamiery videanazirańnia na vulicy kitajskaha horada. Fota: Witthaya Prasongsin / Getty Images

Žurnalisty FT praanalizavali bolš za dziasiatak dziaržaŭnych tendaraŭ i parazmaŭlali ź ludźmi, znajomymi z detalami kantraktaŭ. Jany pryjšli da vysnovy, što miascovyja orhany ŭłady pa ŭsim Kitai aktyŭna ŭkaraniajuć novyja sistemy nazirańnia na bazie štučnaha intelektu (ŠI).

Kitaj i biez taho vałodaje adnoj z samych usioabdymnych sistem nazirańnia ŭ śviecie. Jak nahadvaje FT, jana ŭžo vykarystoŭvałasia dla kantrolu nad ujhurskim nasielnictvam u Sińczianie. Ale, jak adznačajuć ekśpierty, raniejšaja sietka nazirańnia była chutčej reaktyŭnaj. Jana dobra pracavała, kali čałaviek užo traplaŭ pad nahlad, ale drenna raspaznavała namiery ludziej, jakija jašče nie byli abjektam adkrytaha kantrolu.

Jak piša FT, asnoŭnaja meta madernizacyi — pierachod da tak zvanaj «prahnastyčnaj palicejskaj dziejnaści». Kali staraja infrastruktura, stvoranaja dziesiacihodździe tamu, była pasiŭnaj i patrabavała ad palicyi vializnych časavych zatrat na ručny prahlad videa, to novyja sistemy pracujuć na apieradžeńnie.

Madernizacyja aparatu nazirańnia adbyvajecca na fonie rostu kolkaści spantannych aktaŭ vuličnaha hvałtu, jakija ekśpierty źviazvajuć z kryzisam psichičnaha zdaroŭja, pahoršanym ekanamičnymi prablemami i karancinnymi abmiežavańniami padčas pandemii. U 2024 hodzie ministr hramadskaj biaśpieki Van Siaachun nakiravaŭ palicyi dyrektyvu ab nieabchodnaści ŭkaranieńnia ŠI dla papiaredžańnia złačynstvaŭ.

Razumnaja sistema sačeńnia

Technałahičny bok pytańnia hruntujecca na intehracyi vialikich moŭnych madelaŭ i kampjutarnaha zroku ŭ pradukcyju takich hihantaŭ, jak Hikvision i Huawei. Novyja sistemy pracujuć na bolš mahutnych čypach i mohuć apracoŭvać danyja niepasredna ŭ samoj kamiery abo na łakalnym abstalavańni — biez pastajannaj pieradačy infarmacyi ŭ centralnyja data-centry.

Hetyja sistemy navučany prahnazavać i vydavać papiaredžańni ab takich pavodzinach, jak rezkija manieŭry na darozie, vialikija niesankcyjanavanyja schody ludziej, niezakonnaje praniknieńnie na terytoryju ci navat prykmiety suicydalnych namieraŭ, kali čałaviek doŭha znachodzicca kala mosta.

Fota: hikvision.com

Najnoŭšyja raspracoŭki Hikvision dazvalajuć apierataram šukać videazapisy z dapamohaj karotkich tekstavych apisańniaŭ, naprykład, «žančyna ŭ čyrvonym kapielušy». Sistema aŭtamatyčna znachodzić adpaviednyja kadry dziakujučy intehracyi vialikich moŭnych madelaŭ.

Jak raskazaŭ FT adzin ź mieniedžaraŭ Hikvision, palicejskim bolš nie treba hadzinami prahladać zapisy ŭručnuju — dastatkova ŭvieści tekstavy zapyt. U starych sistemach taki pošuk byŭ mahčymy tolki pry najaŭnaści vyjavy-ŭzoru.

Finansavy bok madernizacyi

Pieršyja maštabnyja ŭkaranieńni novych sistem adbyvajucca ŭ hustanasielenych haradskich rajonach, a taksama vakoł vajennych i dziaržaŭnych abjektaŭ.

U adnym z tendaraŭ u miastečku Jaadu ŭ pravincyi Syčuań praduhledžana ŭstalavańnie 175 kamier vysokaj razroznaści z «intelektualnaj sistemaj analizu videa», zdolnaj vyjaŭlać anamalnyja pavodziny i zapuskać sihnały tryvohi. Inšy tendar, apublikavany palicyjaj horada Datuń, uklučaŭ vialiki pieralik techniki Hikvision, u tym liku ŠI-kamiery, jakija mohuć vyznačać poł čałavieka, jaho pastavu i adzieńnie.

Razam z tym siońniašnija vydatki vyhladajuć značna bolš ścipłymi, čym padčas budaŭnictva pieršaj chvali sistem u siaredzinie 2010-ch. Tady, pavodle acenak analitykaŭ, kitajskija ŭłady vydatkavali kala $44 miljardaŭ na kamiery i infrastrukturu.

Ciapier biudžety 12 praanalizavanych FT tendaraŭ vahajucca ad mienš čym $145 tysiač da prykładna $1,45 miljona na rajon.

Dadatkovym faktaram nieabchodnaści madernizacyi staŭ fizičny znos abstalavańnia: kamiery, ustalavanyja ŭ siaredzinie 2010-ch, mocna paciarpieli ad umoŭ nadvorja, asabliva ad vilhotnaha i haračaha leta, charakternaha dla mnohich rehijonaŭ Kitaja.

Adnak finansavyja prablemy miascovych uład i vysoki košt novych kamier (jakija mohuć być utraja daražejšymi za staryja madeli) prymušajuć čynoŭnikaŭ šukać kampramisy.

Zamiest poŭnaj zamieny parku kamier mnohija ŭłady ciapier ustaloŭvajuć «ŠI-PK» — pramiežkavyja sierviery, jakija apracoŭvajuć videa łakalna. Heta dazvalaje nie tolki atrymać novyja funkcyi, ale i źnizić vydatki na vobłačnyja vyličeńni.

Dla bolšaści ludziej madernizacyja sistemy nazirańnia zastajecca amal nieprykmietnaj, asabliva kali abnaŭlajucca tolki sierviery. Ale, jak adznačajuć pradstaŭniki haliny, u haradach, dzie sistemy ŭžo abnavili — naprykład, u Chańčžoŭ, dzie bazujecca Hikvision, — efiekt staŭ adčuvalnym amal adrazu. Pavodle ich słoŭ, novyja technałohii «ekanomiać vielizarnuju kolkaść času».

Kamientary da artykuła