U pahoni za efiektyŭnaściu rabotnikaŭ kiraŭniki fiksujuć usie ich dziejańni: ad praciahłaści znachodžańnia ŭ prybiralni da taho, jak jany siadziać za stałom, i kožnaha zapytu ŭ internecie.
Kamiery nad pracoŭnymi stałami, adsočvańnie telefonaŭ i datčyki ŭ kresłach — voś novaja realnaść kitajskich kampanij. Vydańnie South China Morning Post pryvodzić niekalki prykładaŭ ź miascovych ŚMI.
Supracoŭnica technałahičnaj kampanii ŭ Huančžoŭ na poŭdni Kitaja vyjaviła kamieru prosta nad svaim rabočym miescam paśla taho, jak admoviłasia ad kamandziroŭki praz chvarobu. Pierad hetym u studzieni mieniedžar papiaredziŭ jaje, kab jana nie karystałasia pryvatnymi čatami ŭ pracoŭny čas.
Pravieryŭšy kartu pamiaci kamiery, žančyna žachnułasia: pryłada fiksavała ŭsio — ad tekstavych paviedamleńniaŭ da vyjaŭ na ekranie jaje telefona i kampjutara, paviedamlaje hazieta Workers' Daily.
Inšy vypadak, apisany Southern Metropolis Daily, adbyŭsia ŭ adnoj z kampanij u Chančžoŭ (uschod Kitaja). Tam kiraŭnictva razdało supracoŭnikam «razumnyja» kresły, zdolnyja fiksavać puls, častatu dychańnia i navat pastavu.
Nieŭzabavie mieniedžar spytaŭ ździŭlenuju žančynu, čamu jaje štodnia niama za stałom z 10:00 da 10:30, i papiaredziŭ pra mahčymaje pazbaŭleńnie premii. Žančyna nazvała takoje sačeńnie «žudasnym i hłyboka niepryjemnym».
Takija prykłady — daloka nie redkaść. U rekłamnym ahienctvie ŭ Fučžoŭ (paŭdniova-ŭschodni Kitaj) pajšli jašče dalej: abmiežavali čas na naviedvańnie prybiralni. Rabotniki musili skanavać adbitki palcaŭ na ŭvachodzie i vychadzie, a za pieravyšeńnie limitu pahražali štrafy.
U vieraśni minułaha hoda adnu z supracoŭnic zvolnili za nibyta niepadparadkavańnie bosu i hultajstva. Dokazami ŭ sudzie stali videazapisy i historyja braŭziera na jaje rabočym kampjutary.
Vyśvietliłasia, što supracoŭnica skardziłasia na načalnika ŭ sacsietkach, naviedvała internet-kramy i čytała ramany anłajn. Maštaby tatalnaha sačeńnia šakavali žančynu, jakaja ŭ intervju vydańniu Vista zadałasia pytańniem, dzie prachodzić rysa pamiž karparatyŭnym kantrolem i pravam na pryvatnaść.
Jak rabotniki sprabujuć abaranicca
Z pašyreńniem kantrolu kitajskija rabotniki pačynajuć šukać sposaby abarony. Niechta kuplaje prahramy dla pryvatnych čataŭ za 19,9 juania (kala 3 dalaraŭ), inšyja płaciać pa 50 juaniaŭ za śpiecyjalnyja achoŭnyja filtry dla ekranaŭ telefonaŭ i kampjutaraŭ.
Nabirajuć papularnaść i instrumienty, jakija błakirujuć adsočvańnie aktyŭnaści ŭ braŭziery. U sacsietkach pasty z paradami pa samaabaronie na pracoŭnym miescy sabrali ŭžo bolš za 50 miljonaŭ prahladaŭ.
Ekśpierty adznačajuć, što kitajskaje zakanadaŭstva daje kampanijam peŭnuju svabodu ŭ manitorynhu. Ekśpierty pa kibierbiaśpiecy tłumačać, što firmy ŭstaloŭvajuć sistemy nahladu dla abarony intelektualnaj ułasnaści, kamiercyjnaj tajamnicy i praduchileńnia ŭnutranych pahroz. Ustanoŭka kamier u ofisach ličycca zakonnaj, kali supracoŭnikaŭ papiaredzili zahadzia, a sami pryłady nie znachodziacca ŭ pryvatnych zonach, takich jak tualety abo raspranalni.
U toj ža čas jurysty ŭ kamientary dla South China Morning Post adznačajuć, što ŭ Kitai miaža pamiž karparatyŭnym kiravańniem i pryvatnaściu supracoŭnikaŭ zastajecca razmytaj. Kali kampanija źbiraje asabistuju infarmacyju, jakaja nie datyčycca pracy, jana ryzykuje parušyć prava na pryvatnaść.
Krytyki ličać, što praźmierny tatalny kantrol zamiest pavyšeńnia efiektyŭnaści vyklikaje stres, padryvaje davier i prymušaje rabotnikaŭ pastajanna «abaraniacca». Karystalniki sacyjalnych sietak taksama nie chavajuć svajho abureńnia:
«Kali kampanii nie chočuć, kab ja zajmaŭsia asabistymi spravami ŭ pracoŭny čas, jany pavinny zrabić tak, kab rabota nie lezła ŭ moj asabisty čas», «Heta bolš padobna na turmu, čym na ofis. Kali ludziej pieratvaryć u instrumienty, heta ŭdaryć pa samich karparacyjach».
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku23
Kamientary