Cichanoŭskaja ŭ Kijevie parazmaŭlała z pałonnymi biełarusami, jakija vajavali na baku Rasii

U telehram-kanale ŭkrainskaha prajekta «Chaču žyć» źjaviłasia paviedamleńnie, što 26 maja sakratar Kaardynacyjnaha štaba pa pytańniach abychodžańnia z vajennapałonnymi Dźmitryj Usaŭ pravioŭ sustreču sa Śviatłanaj Cichanoŭskaj i jaje kamandaj.

Fota: pres-słužba Śviatłany Cichanoŭskaj

Paviedamlajecca, što ŭ miežach hetaha vizitu pradstaŭniki biełaruskaj delehacyi zmahli pahutaryć z vajennapałonnymi hramadzianami Biełarusi, jakija ŭdzielničali ŭ bajavych dziejańniach na baku Rasii. Hutarka adbyvałasia praź videasuviaź.

Śviatłana Cichanoŭskaja zapytała pałonnych biełarusaŭ pra ich matyvacyju. Jany adkazali, što pajšli vajavać dziela hrošaj i ciapier škadujuć pra heta.

Bolš infarmacyi pra hetuju sustreču čytajcie ŭ «Našaj Nivie» paźniej.

Śviatłana Cichanoŭskaja padkreśliła, što ŭdzieł hetych ludziej u vajnie suprać Ukrainy nie adlustroŭvaje pazicyju značnaj častki biełaruskaha hramadstva.

«Pa stanie na maj 2026 hoda ŭstanoŭlenyja piersanalnyja danyja 2871 hramadzianina Biełarusi, jaki padpisaŭ kantrakt ź Ministerstvam abarony RF. Jak minimum u dačynieńni da 440 ź ich viadoma pra hibiel abo źniknieńnie bieź viestak. Praz čat-bot «Chaču znajści» atrymana 520 zajavak pa źnikłych bieź viestak asob, u jakich paznačanaja nacyjanalnaść biełarus», — raskazaŭ Dźmitryj Usaŭ.

Fota: t.me/hochu_zhyt

Siarod inšaha Śviatłana Cichanoŭskaja padziakavała Kaardynacyjnamu štabu za jahony ŭdzieł u vyzvaleńni biełaruskich palitviaźniaŭ u śniežni 2025 hoda.

Kamientary da artykuła