Što simvalizujuć padarunki, jakija Cichanoŭskaja pieradała Zialenskamu i jaho žoncy
Siarod padarunkaŭ — vyšyvanka, kałarytnyja zavušnicy i nabor dla stvareńnia tradycyjnaha sałamianaha pavuka.
Śviatłana Cichanoŭskaja pieradała Uładzimiru Zialenskamu i jaho žoncy Alenie padarunki, źviazanyja ź biełaruskaj i ŭkrainskaj tradycyjaj.
Zialenskamu padaryli biełaruskuju vyšyvanku, stvoranuju majstrycaj Śviatłanaj Šyrviel. Adna z vyšyvanak hetaj majstrycy, naprykład, znachodzicca ŭ Lecha Valensy, lehiendarnaha lidara polskaj «Salidarnaści».
«Hetaja kašula vykananaja ŭ technicy «prociah» — adnoj z najbolš aŭtentyčnych biełaruskich technik vyšyŭki. U adroźnieńnie ad bolš raspaŭsiudžanych technik, takich jak «kryžyk», jakija možna sustreć u roznych krainach, «prociah» ličycca admietna biełaruskaj kulturnaj rysaj. Mienavita pa hetaj technicy tradycyjna «čytajecca» biełaruskaje pachodžańnie vyšyŭki», — raskazaŭ bolej daradca Cichanoŭskaj Dzianis Kučynski.
Čyrvony arnamient na čornym kolery — taksama biełaruskaja tradycyja.
«Centralny elemient arnamientu kašuli — vaśmikancovaja zorka. Hety simvał maje histaryčnyja karani jak u biełaruskaj, tak i va ŭkrainskaj kultury i tradycyjna źviazvajecca z soncam, žyćciom, śviatłom i vykonvaje rolu abiareha.
Taksama ŭ arnamiencie prysutničaje kalina — adzin z klučavych ukrainskich simvałaŭ. U tradycyjnaj ukrainskaj kultury jana ŭvasablaje rod, pierajemnaść pakaleńniaŭ, siamiejny ačah, siłu i luboŭ. Samo słova «kalina» etymałahična źviazvajecca z «kołam» — soncam, što dadatkova padkreślivaje ideju žyćcia i suviazi pamiž pakaleńniami», — apisvaje Kučynski.
Druhim padarunkam dla prezidenta Ukrainy stała reč, zroblenaja rukami dziaciej i vychavacielaŭ biełaruska-ŭkrainskaj škoły ŭ Varšavie, jakaja dziejničaje pry Centry biełaruskaj salidarnaści. U hetaj škole navučajucca dzieci byłych biełaruskich palitviaźniaŭ, a taksama biełaruskija i ŭkrainskija dzieci, čyje siemji byli vymušanyja pakinuć svaje damy praz represii i vajnu.
Pieršaj łedzi Ukrainy pieradali zavušnicy z vobrazam sałamianaha «pavuka» — tradycyjnaha abiareha. Pavuk u narodnaj tradycyi ličycca simvałam harmonii, achovy domu i dabrabytu. Zavušnicy vykananyja z łatuni z załatym pakryćciom.
Ich aŭtarka — biełaruskaja dyzajnierka Nasta Vasiučenka, zasnavalnica brendu Kanva.
Taksama siamji Zialenskich padaryli siamiejny nabor dla stvareńnia sałamianych «pavukoŭ». «Ideja hetaha padarunka ŭ tym, kab muž i žonka mahli razam stvaryć chatni abiareh jak znak umacavańnia siamji, domu i ŭzajemnaj padtrymki», — raskazvaje daradca Cichanoŭskaj.
Padaryli taksama knihu Sašy Filipienki «Słon». Sam piśmieńnik byŭ u składzie delehacyi, jakaja ź Cichanoŭskaj pryjechała va Ukrainu.
Kučynski dadaje, što padarunki ad biełaruskaj delehacyi simvalizujuć ahulnaść histaryčnaha dośviedu biełarusaŭ i ŭkraincaŭ, pavahu da tradycyi, a taksama salidarnaść pamiž narodami.
Kamientary
Dziŭna, što nie złatkoŭskuju i nie rahatku.