Kurcoŭ prahoniać z hankaŭ šmatkvaternych damoŭ i internataŭ

U Biełarusi płanujuć uzmacnić antytytuniovaje zakanadaŭstva i ŭzmacnić kantrol za ŭžyvańniem tytuniu i elektronnych cyharet. Pra heta paviedamiła zahadčyca adździaleńnia hramadskaha zdaroŭja Respublikanskaha centra hihijeny i hramadskaha zdaroŭja Volha Bartman, piša ahienctva «Minsk-Naviny».

Zdymak ilustracyjny. Fota z sacsietak

Adna z hałoŭnych prapanavanych źmien — uzmacnieńnie adkaznaści za prodaž nikacinaźmiaščalnaj pradukcyi niepaŭnaletnim. Taksama bolš žorstka buduć karać darosłych, jakija nabyvajuć takuju pradukcyju dla padletkaŭ. Akramia taho, płanujecca ŭvieści dadatkovyja patrabavańni da vytvorcaŭ elektronnych cyharet i sistem nahravańnia tytuniu.

Jašče adna važnaja źmiena — pašyreńnie śpisu miescaŭ, dzie budzie zabaroniena kureńnie. U jaho źbirajucca ŭklučyć, naprykład, hanki šmatkvaternych damoŭ i internataŭ.

Zaraz u Biełarusi ŭžo dziejničajuć davoli strohija praviły: zabaroniena adkryta vykładvać cyharety ŭ kramach, isnujuć abmiežavańni na kureńnie ŭ hramadskich miescach, abaviazkovaja śpiecyjalnaja markiroŭka pradukcyi i poŭnaja zabarona prodažu asobam da 18 hadoŭ. Za parušeńni praduhledžanaja administracyjnaja adkaznaść, a kantrol viadziecca pastajanna.

Adnačasova na ŭzroŭni Jeŭrazijskaha ekanamičnaha sajuza raspracoŭvajecca ahulny techničny rehłamient dla takoj pradukcyi. Praces idzie ŭžo niekalki hadoŭ i pakul nie zavieršany, bo krainy majuć roznyja padychody. Naprykład, u Kazachstanie elektronnyja cyharety ŭžo całkam zabaronienyja, i padobnyja miery razhladajucca taksama ŭ inšych krainach miždziaržaŭnaj arhanizacyi.

Kamientary da artykuła