Z kim siabrujuć unučki Łukašenki? Ich maci zrabiła hałavakružnuju karjeru

Rasśledavańnie «Biuro» vyjaviła niekatoryja padrabiaznaści šmathadovaha siabroŭstva pamiž dziećmi Viktara Łukašenki i siamjoj biznesvumien Ludmiły Niaronskaj.

Lipień 2019 hoda. Hanna Jaraš i Viktoryja Łukašenka ŭ Dublinie, Irłandyja. Krynica: instahram-akaŭnt Hanny Jaraš

Jak vyśvietliła «Biuro», asabliva blizkija adnosiny skłalisia pamiž unučkaj Alaksandra Łukašenki Viktoryjaj Łukašenka i Hannaj Jaraš — starejšaj dačkoj biznes-łedzi, uładalnicy rybnaj impieryi, Ludmiły Niaronskaj.

Samyja rannija sumiesnyja fatahrafii Viktoryi Łukašenki i Hanny Jaraš, jakija zdoleli adšukać žurnalisty, datujucca 2014 hodam. Imavierna, dziaŭčaty paznajomilisia jašče padčas vučoby ŭ minskaj himnazii №16 — adnoj z prestyžnych škoł stalicy. Miarkujučy pa ŭsim, jany byli adnakłaśnicami.

Hanna Jaraš (źleva) i Viktoryja Łukašenka (sprava). 2014 hod. Krynica: instahram-akaŭnt Hanny Jaraš

Paśla škoły Viktoryja Łukašenka pastupiła na fakultet mižnarodnych adnosinaŭ BDU, a Hanna Jaraš pajechała ŭ Vialikabrytaniju, dzie vyvučała elektratechničnuju i elektronnuju inžynieryju va ŭniviersitecie Notynhiema.

Červień 2016 hoda. Vypuskny viečar Viktoryi Łukašenki (druhaja źleva ŭ čyrvonaj sukiency) i Hanny Jaraš (čaćviortaja sprava ŭ čyrvonaj sukiency). Krynica: instahram-akaŭnt Hanny Jaraš

Niahledziačy na adlehłaść, dziaŭčaty praciahvali padtrymlivać ciopłyja adnosiny. U sacsietkach Hanny Jaraš zachavałasia videa, dzie Viktoryja Łukašenka vinšuje Ludmiłu Niaronskuju z dniom narodzinaŭ i nazyvaje jaje «ciociaj Ludaj».

Rasśledavańnie pakazvaje, što Niaronskija i Łukašenki nie tolki siabravali, ale i rehularna adpačyvali razam.

Lipień 2016 hoda. Viktoryja Łukašenka i Hanna Jaraš u Rymie. Krynica: instahram-akaŭnt Hanny Jaraš

U lipieni 2016 hoda Viktoryja Łukašenka i Hanna Jaraš razam pajechali ŭ Rym. Pavodle źviestak «Kibierpartyzan», u Italiju jany lacieli ŭ kampanii Ludmiły Niaronskaj, Lilii Łukašenki i małodšaha syna Viktara Łukašenki — Alaksandra.

Praz try hady, u lipieni 2019-ha, kampanija znoŭ sustrełasia ŭ Jeŭropie — hetym razam u Dublinie. 

Lipień 2019 hoda. Hanna Jaraš i Viktoryja Łukašenka ŭ Dublinie, Irłandyja. Krynica: instahram-akaŭnt Hanny Jaraš

Žurnalisty naličyli jak minimum čatyry sumiesnyja zamiežnyja pajezdki Niaronskich i Łukašenkaŭ — u 2015, 2016, 2018 i 2019 hadach.

Raniej paviedamlałasia, što ŭ 2019 hodzie Niaronskaja razam ź siamjoj Viktara Łukašenki (žonkaj i dziećmi) latała na pryvatnym biznes-džecie ź Minska ŭ Dubaj. Na zvarotnym šlachu da ich dałučyŭsia i sam Viktar.

Blizkija adnosiny pamiž siemjami zachoŭvajucca i pa-za adpačynkami.

Naprykład, u žniŭni 2022 hoda pradstaŭniki siamji Łukašenki byli na raskošnym viasielli Hanny Jaraš. U zaharadnym kompleksie «Isłač-park» sabralisia dziasiatki haściej, dla jakich arhanizavali tancy pad žyvy akampaniemient, fotazony, nastolnyja hulni i vyjazny bar.

Dźmitryj Dziatłaŭ i Viktoryja Łukašenka na viasielli Hanny Jaraš

Siarod haściej žurnalisty zaŭvažyli Viktoryju Łukašenku razam z mužam Dźmitryjem Dziatłavym.

U 2023 hodzie sužencaŭ Dziatłavych taksama zaŭvažyli siarod haściej na viasielli Ściapana — syna treciaha muža biznes-łedzi Hleba Niaronskaha ad pieršaha šlubu.

Dźmitryj Dziatłaŭ i Viktoryja Łukašenka na viasielli Ściapana Niaronskaha

Padobna, što siabroŭstva raspaŭsiudžvajecca i na inšych pradstaŭnikoŭ dźviuch siemjaŭ.

U krasaviku 2025 hoda druhaja dačka Ludmiły Niaronskaj Taćciana Zajcava była zaŭvažanaja na matčy «Dynama-Minsk» suprać čalabinskaha «Traktara». Pobač ź joj na trybunie znachodzilisia Viktar Łukašenka i jaho dačka Valeryja Łukašenka.

Vierchni šerah źleva naprava: Valeryja Łukašenka i Taćciana Zajcava. Nižni šerah źleva naprava: Darja Domračava i Ule-Ejnar Bjorndalen. Krynica: @sport5.by / Instagram

Biznes-impieryja Niaronskaj

Ludmiła Niaronskaja — biełaruskaja biznesvumien, jakaja z pačatku 2000‑ch hadoŭ pracavała ŭ śfiery handlu i transparciroŭki zvadkavanych vuhlevadarodnych hazaŭ. Razam ź biznesoŭcam Arturam Zubarykam jana raźvivała kampanii «Syravinnyja resursy — Bieł», «Transekśpiedycyja» i «Hazenerdžychim». U 2017—2018 hadach struktury Niaronskaj nazyvalisia siarod asnoŭnych udzielnikaŭ reekspartu rasijskaha ZVH va Ukrainu i Polšču praź Biełaruś. Paśla pačatku vajny va Ukrainie i ŭviadzieńnia sankcyj hety biznes faktyčna spyniŭsia.

Asabniak Niaronskich u vioscy Prudziščy pad Minskam. Fota: buromedia.io

U 2022 hodzie Niaronskaja pačała raźvivać rybny biznes, zarehistravaŭšy ŭ sakaviku kampaniju «Marskija promysły», a ŭžo ŭ krasaviku taho ž hoda ŭ Rasii stvaryła kampaniju «Sajuznyja rybnyja promysły». Pavodle rasśledavańnia «Biuro», firma atrymała kvoty na vyłaŭ ryby na Dalokim Uschodzie ŭ miežach biełaruska-rasijskich pahadnieńniaŭ. U kastryčniku 2022 hoda Niaronskaja zasnavała kampaniju «Marskija siezony», a paźniej — «Marskuju manufakturu», jakaja raźvivaje rybnuju kramu i kafe pad brendam «Rybny dom «Marskija siezony».

Pryvatny park Niaronskich. Fota: buromedia.io

Jak adznačaje «Biuro», va ŭsich zhadanych firmach roznyja pasady zajmaŭ Dźmitryj Dziatłaŭ — muž Viktoryi Łukašenki i ziać Viktara Łukašenki. Adnak, jak śćviardžajuć rasśledvalniki, jon nie adziny, chto atrymlivaje vyhadu ad rybnaj impieryi Niaronskaj.

U červieni 2025 hoda Ludmiła Niaronskaja na paru z synam Viktara i Lilii Łukašenki, Alaksandram Łukašenkam-małodšym, zarehistravała sumiesny biznes — firmu «Siezon upakoŭki». Akramia taho, u strukturach Niaronskaj pracuje jašče i muž rodnaj siastry Lilii Łukašenki — Alaksandr Harusaŭ. Z 2024 hoda jon pracuje ŭ «Marskich siezonach» namieśnikam dyrektara pa biaśpiecy.

Kamientary da artykuła