Samaja paśpiachovaja biełaruskaja biznesvumien udvaja pavialičyła prybytkovaść zdabyčy ryby na Dalokim Uschodzie

Z 2023 hoda hetaja kampanija manapolna asvojvaje štohadovuju kvotu na zdabyču ryby ŭ Bierynhavym i Achockim morach, jakuju rasijskija ŭłady vydzialajuć Biełarusi. U minułym hodzie na «Sajuznyja rybnyja promysły» prypała kala 85% usioj kvoty (56 tysiač z 65 tysiač ton), na jakuju rasščodryłasia Rasrybałoŭstva.

Dla «Sajuznych rybnych promysłaŭ» jana składałasia ź mintaja i sieladca.

Ale kvota nie była całkam asvojenaja. Heta adbiłasia na vyručcy «Sajuznych rybnych promysłaŭ», jakaja skaraciłasia ŭ paraŭnańni z papiarednim hodam amal na 25% — da 2 miljardaŭ rasijskich rubloŭ (kala 25,5 miljonaŭ dalaraŭ). Ale voś pa prybytku biznes vyras. «Sajuznyja rybnyja promysły» zarabili ŭ minułym hodzie 540 miljonaŭ rasijskich rubloŭ (amal 7 miljonaŭ dalaraŭ) čystaha prybytku, što ŭ dva razy bolš, čym hodam raniej.

Na biahučy hod biełaruski bok prasiŭ pavialičyć kvotu amal da 100 tysiač ton, «uraznastaiŭšy» jaje krevietkami i bolš kaštoŭnymi vidami ryby (traskoj i h.d.). 80% ź jaje chacieła Ludmiła Niaronskaja.

Ale Rasija praihnaravała prośbu i, bolš za toje, navat urezała kvotu na biahučy hod. Jana składzie mienš za 60 tysiač ton.

Raniej raskazvałasia, jak Niaronskaja dziakujučy siabroŭstvu ź siamjoj starejšaha syna Łukašenki Viktara zarablaje na rybnym biznesie ŭ Biełarusi i Rasii razam z maładym ziaciem Łukašenki Dźmitryjem Dziatłavym. Apošni zajmaje pasadu namieśnika pa ahulnych pytańniach adrazu ŭ dźviuch kampanijach Ludmiły Niaronskaj — «Marskija siezony» i «Marskija promysły», dzie jaho štomiesiačnaja zarabotnaja płata bruta składaje bolš za 10 tysiač biełaruskich rubloŭ. 

Akramia taho, niadaŭna «Biuro» vyśvietliła, što ŭ strukturach Niaronskaj pracuje nie tolki ziać, ale i syn Viktara Łukašenki — Alaksandr Łukašenka-małodšy. U jaho va ŭłasnaści 20% kampanii «Siezon upakoŭki», jana budzie zajmacca vytvorčaściu hafravanaj papiery i kardonu, papiarovaj i kardonnaj tary. Firma zarehistravanaja ŭ admysłovaj ekanamičnaj zonie «Bremina-Orša», jakuju z-za šyrokich ilhot i prefierencyj u narodzie prazvali «aršanskim afšoram».

Dzieci Niaronskaj i starejšaha syna Alaksandra Łukašenki Viktara razam vučylisia ŭ minskaj himnazii №16. Razam sa svaimi dziećmi, dziećmi Viktara Łukašenki i jahonaj žonkaj Niaronskaja ŭ 2019 hodzie lotała na pryvatnym biznes-džecie ź Minska ŭ Dubaj. Na zvarotnym šlachu da ich dałučyŭsia i Viktar Łukašenka.

• 0
• 4
• 0
• 0
• 0
• 0
• 1
• 0