Žanočaja moładzievaja i nacyjanalnaja chakiejnyja zbornyja debiutujuć na čempijanacie śvietu
Zbornyja pačnuć svoj šlach na turniry z samych nizoŭ.
Chakieistki nacyjanalnaj (heta značyć — darosłaj) pačnuć svoj šlach u turnirach Mižnarodnaj fiederacyi z samych nizoŭ, pačynajučy z čaćviortaha dyvizijona ŭ nastupnym hodzie, paviedamlaje telehram-kanał «Chakiejnaja ekzotyka»
Supiernicami debiutantak stanuć zbornyja Sinhapura, Irana i Indyi. Arhiencina i Małajzija padavali zajaŭki, ale nie debiutujuć u hetym hodzie.
Raniej žanočaja zbornaja Biełarusi źbirałasia nierehularna, nie pravodziačy mižnarodnych matčaŭ. Z 2010 pa 2013 hod u Minsku isnavaŭ kłub «Pantera», jaki pradstaŭlaŭ krainu ŭ Jeŭrapiejskim žanočym Kubku čempijonaŭ.
Taksama budzie zasnavanaja i moładzievaja chakiejnaja zbornaja. Jana startuje z treciaha dyvizijona. Supiernikami buduć zbornyja Litvy, Tajłanda, Irana i Bałharyi.
Data i miesca praviadzieńnia turniru buduć vyznačany vosieńniu na čarhovym Kanhresie Mižnarodnaj fiederacyi chakieju. Zajaŭki na praviadzieńnie turniru adpravili Bałharyja i Litva.
Biełaruski chakiej, jak i rasijski, byŭ u chakiejnym banie ź lutaha 2022 hoda paśla pačatku poŭnamaštabnaha ŭvarvańnia Rasii z vykarystańniem terytoryi Biełarusi va Ukrainu. Biełaruskija zbornyja ź viasny 2022 hoda nie ŭdzielničali ŭ mižnarodnych spabornictvach, naprykład, u čempijanatach śvietu.
Siońnia, zdajecca, pačałosia viartańnie biełaruskaha chakieja ŭ śviet. Ministr sportu Rasii Michaił Dziehciaroŭ paviedamiŭ, što Dyscyplinarny saviet Mižnarodnaj fiederacyi chakieja na lodzie anulavaŭ rašeńnie Savieta IICHF ab niadopusku zbornych Rasii i Biełarusi da spabornictvaŭ siezona-2026/27.
Tak było pryniata rašeńnie pra viartańnie junijorskaj zbornaj Biełarusi (uzrost hulcoŭ da 18 hadoŭ) na čempijanat śvietu.
A voś moładzievaja i nacyjanalnaja mužčynskija zbornyja nie zhulajuć u nastupnym hodzie na čempijanatach śvietu.