U Łatvii ŭtvaryli novy ŭrad

Siejm Łatvii 28 maja zaćvierdziŭ novy ŭrad, jaki ŭznačaliŭ Andrys Kułbierhs. U kaalicyju ŭvajšli čatyry palityčnyja siły: «Abjadnany śpis», «Novaje adzinstva», Sajuz «zialonych» i sialan, a taksama «Nacyjanalnaje abjadnańnie». U apazicyi zastalisia «Prahresiŭnyja» i «Łatvija na pieršym miescy», paviedamlaje Delfi.lv.

Andrys Kułbierhs. Fota: facebook.com/andris.kulbergs

Za novy skład urada prahałasavali 66 deputataŭ, suprać — 25. Urad budzie pracavać niadoŭha, bo ŭžo 3 kastryčnika ŭ krainie adbuducca parłamienckija vybary, paśla jakich sfarmirujuć novy skład Siejma i novuju kaalicyju.

Niekatoryja ministry z papiaredniaha ŭrada, u pryvatnaści ministr zamiežnych spraŭ i ministr abarony, zachavali svaje pasady.

Pavodle palityčnaha składu novy ŭrad ličycca bolš nacyjanalna-kansiervatyŭnym i aryjentavanym na tradycyjnyja kaštoŭnaści.

Andrys Kułbierhs zajaviŭ, što hałoŭnyja zadačy jaho kabinieta — harantavańnie biaśpieki krainy (źniešniaj, unutranaj, enierhietyčnaj) i raźvićcio ekanomiki. Jon padkreśliŭ, što biaśpieka i ekanomika ciesna źviazanyja pamiž saboj.

Partyja «Abjadnany śpis», jakuju pradstaŭlaje Kułbierhs, była najbujniejšaj apazicyjnaj siłaj u parłamiencie, što i paŭpłyvała na rašeńnie prezidenta Łatvii Edharsa Rynkievičsa daručyć farmavańnie novaha ŭrada mienavita jamu.

Sam Kułbierhs pryjšoŭ u palityku adnosna niadaŭna — u 2022 hodzie, da hetaha jon byŭ viadomy jak biznesmien i ekśpiert u aŭtamabilnaj śfiery. U parłamiencie jon aktyŭna ŭdzielničaje ŭ dyskusijach i zajmaŭsia rasśledavańniem prablem, źviazanych z bujnymi infrastrukturnymi prajektami.

Papiaredni ŭrad na čale z Evikaj Siliniaj padaŭ u adstaŭku paśla raspadu kaalicyi. Heta adbyłosia na fonie palityčnych sprečak, u tym liku vakoł situacyi z adstaŭkaj ministra abarony, što ŭ vyniku pryviało da kryzisu ŭłady.

Novy ŭrad byŭ sfarmiravany vielmi chutka — prykładna za 10 dzion, paśla taho jak u siaredzinie maja papiaredni kabiniet na čale z Evikaj Siliniaj pajšoŭ u adstaŭku z-za raspadu kaalicyi.

Kamientary da artykuła