U Rasii nazvali ceny na novyja «Vołhi». Ci varta čakać ich u Biełarusi i što heta naohuł za aŭto?
Pad adrodžannym brendam «Vołha» budzie chavacca daŭno viadomaja biełarusam marka.
Skrynšot: volga.auto
Ad razmoŭ da vynikaŭ 4 hady
Pra płany adradzić vypusk aŭtamabilaŭ pad brendam «Vołha» ŭ Rasii ŭpieršyniu ŭsurjoz zahavaryli jašče letam 2022 hoda, paśla taho jak suśvietnyja aŭtavytvorcy pačali pakidać Rasiju ŭ adkaz na vajennuju ahresiju suprać Ukrainy.
Prezientavali «novyja» Volga ŭ mai 2024 hoda. Tady ŭ Nižnim Noŭharadzie pakazali adrazu try novyja aŭtamabili: siedan Volga S40 i dva krasoviery — Volga K30 i Volga K40.
Aŭtamabili «Vołha», jakija tak i nie pačali vypuskać. Fota: Maksim Stuliŭ / Viedamaści
Pa fakcie heta byli try aŭtamabili kitajskaha brenda Changan, tolki z «vołhaŭskimi» rašotkami radyjatara i šyldzikami. Ale kałabaracyja z Changan tak i nie adbyłasia, i vypusk kitajskich aŭto pad rasijskim brendam tak i nie pačaŭsia.
U vyniku rasijanie znajšli novaha partniora, jakim akazaŭsia kancern Geely. Dniami «Vołha» ahučyła ceny na svaje aŭto i anansavała pačatak prodažaŭ u červieni.
Źbirać kitajska-rasijskija aŭtamabili buduć na byłych zavodach kancerna VW u Nižnim Noŭharadzie, dzie da vajny vypuskali VW i Škoda.
Što za madeli?
Prynamsi na starcie ŭ «Vołhi» budzie try madeli: dva krasoviery i adzin siedan. Ad kitajskich Geely rasijskija «Vołhi» buduć adroźnivacca bampieram, rašotkaj radyjatara i optykaj.
Što da krasovieraŭ, to jany dobra viadomyja biełarusam. Samaja tannaja Volga K40 — heta Geely Atlas.
Volga K40 i Geely Atlas. Skrynšoty: volga.auto, geely.by
Ceny na kitajskija aŭto rasijskaj zborki buduć pačynacca z 2,75 młn rasijskich rubloŭ, što kala 38 530 dalaraŭ pa ciapierašnim kursie.
U nas ža ceny na taki samy krasovier, ale tolki biełaruskaj zborki pačynajucca z 92 900 rubloŭ, što kala 32 400 dalaraŭ pa aktualnym kursie.
Druhi,bolš darahi, krasovier Volga K50 — heta Geely Monjaro. Ceny na ich u Rasii buduć pačynacca z 4,2 młn rasijskich rubloŭ (amal 59 tysiač dalaraŭ).
Volga K50 (Geely Monjaro). Skrynšot: volga.auto
Geely Monjaro biełaruskaj zborki ŭ nas pradajuć pa cenach ad 115 900 rubloŭ, što kala 40 400 dalaraŭ.
Adznačym, što, niahledziačy na znachodžańnie ŭ adzinaj mytnaj prastory, prykmietnaja roźnica ŭ cenach na anałahičnyja aŭto miascovych zborak u Biełarusi i Rasii — źjava čakanaja, bo ŭ kožnaj krainy asobnyja staŭki ŭtylzboru. Navat spradviečna rasijskaja Lada u Biełarusi kaštuje tańniej, čym u samoj Rasii.
Ale zakanadaŭča zroblena tak, što hramadzianie RF nie mohuć nabyvać novyja aŭto ŭ Biełarusi. Dakładniej, mohuć, ale buduć vymušanyja dapłačvać hrošy ŭ rasijski biudžet, tamu sensu ŭ hetym niama.
Što da siedana «Vołha», to madel Volga C50 — heta Geely Preface. Pačatkovyja ceny na ich składajuć 2,9 młn rasijskich rubloŭ (kala 40 600 dalaraŭ). Paraŭnać z canoj anałahičnych aŭto ŭ Biełarusi składaniej, bo anałaha hetaha aŭto ŭ Biełarusi nie źbirajuć i aficyjna ŭ krainu nie impartujuć.
Skrynšot: volga.auto
A mašynu 2025 hoda z prabieham 8500 km u Minsku pradajuć za 28 tysiač dalaraŭ.
Ci varta čakać «Vołhi» na biełaruskich darohach?
Što da krasovieraŭ, to adkaz adnaznačny — nie, bo ŭ Biełarusi jość Geely Atlas i Monjaro ułasnaj zborki, tamu kitajska-rasijskija parkietniki kali i źjaviacca na našych darohach, to ŭ jakaści haściej z uschodu.
Ale i źjaŭleńnie ŭ prodažy siedana Volga C50 u Biełarusi taksama małavierahodnaje, jak nie źjavilisia ŭ Biełarusi i «Maskvičy».
Raniej pa padobnaj schiemie ŭ Rasii «adradzili» brend «Maskvič», jakija ciapier źbirajuć na mahutnaściach byłoha zavoda Renault u Maskvie. Jak i ŭ vypadku z «Vołhaj», ad rasijskaha tam tolki nazva.