Paraŭnali ceny na aŭtamabili biełaruskaj i rasijskaj vytvorčaści ŭ Biełarusi i Rasii. Roźnica vas ździvić
Marka Lada zajmaje druhuju pazicyju pa abjomie prodažaŭ novych aŭtamabilaŭ u Biełarusi. Rasijskija mašyny sastupajuć pa papularnaści tolki biełaruska-kitajskim Geely/Belgee. Pahladzieli, u jakoj krainie hetyja aŭto pradajucca tańniej.
Biełaruś vs Rasija
Pa vynikach pieršaha kvartała 2025 marki Belgee/Geely zaniali 42% rynku novych aŭto ŭ Biełarusi, a na dolu Lada pryjšłosia 33% prodažaŭ.
Ceny na rasijskija Lada ŭ Biełarusi pačynajucca z 33 700 rubloŭ (kala $11 200) za siedan «Łada Hranta» ŭ bazavaj kamplektacyi na stalnych dyskach.
U Rasii ceny na aŭto ŭ anałahičnaj kamplektacyi startujuć z 1,05 miljona rasijskich rubloŭ (kala $12 700).
Roźnica składaje kala $1500. Atrymlivajecca, što rasijskaja mašyna ŭ Biełarusi pradajecca tańniej, čym u Rasii.
Toje samaje i z Lada Vesta, na jakuju letaś pryjšoŭsia 51% prodažaŭ «Łady» ŭ Biełarusi. Kali ŭ dyleraŭ u Minsku ceny na siedan u kamplektacyi «kamfort» pačynajucca z 46 090 rubloŭ (kala $15 300), to anałahičny aŭtamabil u Maskvie pradajecca za 1,5 miljona rasijskich rubloŭ (kala $18 600). Roźnica ŭ canie składaje bolš za 20%.
A što z cenami na Geely/Belgee?
U Biełarusi krasovier Belgee x50 dastupny pa canie ad 66 000 rubloŭ (kala $22 000).
U Rasii biełaruska-kitajskija krasoviery pradajuć pa cenach ad 1,97 miljona rasijskich rubloŭ, što kala 24 tysiač dalaraŭ. To-bok na $2000 ci kala 10% daražej, čym u Biełarusi.
Jak takoje mahčyma?
Pavodle słoŭ vice-prezidenta Nacyjanalnaha aŭtamabilnaha sajuza Rasii Jana Chajcera, aŭtamabili Lada ŭ Biełarusi kaštujuć tańniej, čym u Rasii, praz toje, što naš rynak značna bolš kankurentny, čym rasijski. «AŭtaVAZu» davodzicca iści na značnyja sastupki, kab pryciahnuć pakupnikoŭ.
«Dla «AŭtaVAZa» biełaruski pakupnik — vielmi važny klijent, i kampanija zmahajecca za svajo miesca na rynku. Roźnica adčuvalnaja: jana moža dasiahać 300—400 tysiač rasijskich rubloŭ ($3400-$4500 — NN)», — udakładniaŭ ekśpiert.
Siarod inšych pryčyn taksama nazyvajuć 140-y ŭkaz, jaki dazvalaje pryvozić u Biełaruś aŭtamabili z trecich krain, zapłaciŭšy myta z 50% źnižkaj, a taksama roźnicu ŭ naličeńni ŭtylizacyjnaha zboru. Inšymi słovami, patrymany VW Passat, jaki možna pryvieźci ź Jeŭropy, taksama stvaraje dadatkovuju kankurencyju pradaŭcam novych mašyn. Na rasijskim rynku situacyja krychu inšaja — u tamtejšych dyleraŭ niama takich rynkavych ryčahoŭ dla strymlivańnia cen.
Dyk rasijanam vyhadna jechać u Biełaruś pa novyja aŭto?
Na pieršy pohlad — tak. I sapraŭdy, rasijanie mohuć nabyvać novyja aŭtamabili ŭ Biełarusi. Praŭda, pastavić ich na ŭlik u Rasii biez dadatkovych vydatkaŭ nie atrymajecca z-za roznych patrabavańniaŭ.
A kali rasijski pakupnik vykanaje ŭsie ŭmovy dla rehistracyi na radzimie, ekanomija amal źniknie.
Takim čynam, novyja mašyny ŭ biełaruskich dyleraŭ choć i kaštujuć tańniej, ale de-fakta pryznačanyja tolki dla miascovych pakupnikoŭ.
Kamientary