Biełarusam źbirajucca dazvolić palavać jašče na adnu žyviolinu

Načalnik adździeła palaŭničaj haspadarki Ministerstva lasnoj haspadarki Alaksandr Kazarez paviedamiŭ, što ŭ Biełarusi najbližejšym časam płanujuć dazvolić palavańnie na janota-pałaskuna, a taksama pierahledzieć pamiery zon, dzie palavańnie zabaroniena pablizu nasielenych punktaŭ.

Janot-pałaskun. Zdymak ilustracyjny. Fota: magnific.com

Pa słovach čynoŭnika, u krainie praciahvaje raści kolkaść bolšaści vidaŭ dzikich žyvioł. Tak, na kaniec 2025 hoda ŭ Biełarusi naličvałasia 1289 miadźviedziaŭ i 2556 rysiaŭ, što prykmietna bolš, čym hodam raniej.

Asablivuju zaniepakojenaść u śpiecyjalistaŭ vyklikaje rost papulacyj lisaŭ i janotapadobnych sabak, asabliva ŭ zachodnich rehijonach krainy. Hetyja žyvioły mohuć być pieranosčykami šalenstva, niebiaśpiečnaha jak dla ludziej, tak i dla svojskich žyvioł. Tamu dziaržava praciahvaje prymać miery dla rehulavańnia ich kolkaści.

Pakolki cikavaść palaŭničych da zdabyčy futra ciapier značna źniziłasia, dla stymulavańnia palavańnia na hetych drapiežnikaŭ u asobnych rajonach arhanizujuć konkursy i navat praduhledžvajuć hrašovyja ŭznaharody.

U Ministerstvie lasnoj haspadarki taksama prapanujuć skaracić pamiery terytoryj vakoł nasielenych punktaŭ, dzie palavańnie ciapier zabaroniena. Heta źviazana z tym, što lisy ŭsio čaściej sielacca pobač ź ludźmi, znachodziačy tam lohkija krynicy charčavańnia.

Što tyčycca śpisu palaŭničych vidaŭ, to istotnych źmien u ich nie čakajecca. Raniej abmiarkoŭvałasia mahčymaść uklučeńnia ŭ jaho tarpanapadobnaha kania i lebiedzia, ale hetyja prapanovy padtrymki nie atrymali. Śpiecyjalisty adznačajuć, što biełarusy tradycyjna ŭsprymajuć kania jak pamočnika čałavieka, a lebiedzia — jak simvał viernaści.

Zatoje ŭ śpis mohuć uklučyć janota-pałaskuna. Hety zaviezieny vid aktyŭna raspaŭsiudžvajecca pa terytoryi Biełarusi i moža vyciaśniać miascovyja vidy žyvioł. Tamu jaho kolkaść płanujuć rehulavać z dapamohaj palavańnia.

Kamientary da artykuła