U Lepielskim rajonie mužčyna ŭpalavaŭ vaŭka, i heta stała pačatkam niepryjemnaściaŭ
U Lepielskim rajonie 37‑hadovy mužčyna trapiŭ pad śledstva paśla taho, jak u jahonym aŭtamabili znajšli tušu vaŭka z ahniastrelnym ranieńniem, paviedamlaje Śledčy kamitet.
Zdymak ilustracyjny. Fota: magnific.com
Incydent adbyŭsia 6 krasavika 2026 hoda padčas rejdu supracoŭnikaŭ inśpiekcyi achovy žyviolnaha i raślinnaha śvietu. Jany spynili aŭtamabil Volkswagen, za rulom jakoha znachodziŭsia miascovy žychar. Padčas ahladu ŭ sałonie była znojdziena tuša vaŭka.
Spačatku ŭ dačynieńni da mužčyny pačali administracyjny praces, adnak jon pasprabavaŭ uciačy. Pa infarmacyi śledstva, jon sieŭ u mašynu, pajechaŭ u bok inśpiektaraŭ, najechaŭ na adnaho ź ich i pakinuŭ miesca zdareńnia. Paźniej jaho zatrymali pry padtrymcy supracoŭnikaŭ DAI.
Paśla zatrymańnia mužčyna taksama nibyta pahražaŭ pradstaŭniku inśpiekcyi. U vyniku jamu vystavili abvinavačańnie ŭ prymianieńni hvałtu i pahrozie hvałtam u dačynieńni da słužbovaj asoby pry vykanańni joj słužbovych abaviazkaŭ.
Da suda abvinavačany budzie znachodzicca pad vartaj. Na jaho majomaść nakładzieny aryšt. Paviedamlajecca, što raniej jon užo byŭ sudzimy za kradziež.
Asobna pravodzicca pravierka pa fakcie niezakonnaj zdabyčy vaŭka.
Čytajcie taksama:
Pad Rečycaj źniali, jak voŭk pierapłyvaje raku VIDEA