Pucin nazvaŭ «chamstvam» adkryty list Zialenskaha. I admoviŭsia ad sustrečy ź im

Padčas vystupleńnia na Pieciarburhskim mižnarodnym ekanamičnym forumie Uładzimir Pucin prakamientavaŭ adkryty list Uładzimira Zialenskaha, u jakim ukrainski prezident prapanoŭvaŭ jamu asabistuju sustreču i spynieńnie ahniu.

Uładzimir Pucin. Fota: Kirill Kazachkov / Roscongress Foundation via AP

Pucin paviedamiŭ, što aznajomiŭsia ź listom paśla taho, jak jamu pieradaŭ jaho pres-sakratar Dźmitryj Piaskoŭ. Prytym vykazaŭsia pra list padkreślena pahardliva. Maŭlaŭ, «Piaskoŭ učora pakazaŭ mnie list Zialenskaha, ja pahladzieŭ z ranicy hetu papierku». 

Kamientujučy zhadku ŭ hetym liście pra svoj uzrost, jon zajaviŭ, što hałoŭnaje dla palityka — nie hady, a zdolnaść efiektyŭna pracavać i vykonvać svaje abaviazki.

Na prapanovu asabistaj sustrečy ź Zialenskim Pucin adkazaŭ admoŭna. Pavodle jaho słoŭ, Ukraina imkniecca spynić rasijskaje nastupleńnie, u toj čas jak Rasija zacikaŭlenaja ŭ doŭhaterminovych damoŭlenaściach, a nie ŭ časovym pieramirji. Jon taksama adznačyŭ, što Maskva nie choča paŭtareńnia pahadnieńniaŭ, padobnych da kolišnich minskich.

Pucin vykazaŭ nierazumieńnie nakont taho, čamu Kijeŭ nie žadaje bačyć administracyju Donalda Trampa ŭ roli haranta mahčymych budučych damoŭlenaściaŭ. Pry hetym jon padziakavaŭ Trampu za jaho namahańni ŭ adnosinach da vypraŭleńnia «manieraŭ» Zialenskaha i dadaŭ, što praca ŭ hetym kirunku jašče nie zavieršanaja.

Taksama rasijski kiraŭnik zajaviŭ, što niadaŭna Zialenski nibyta pieradavaŭ jamu prośbu ab asabistaj sustrečy praz rasijskaha biznesmiena. Pavodle słoŭ Pucina, heta adbyłosia 21 maja. Publičnuju dyskusiju vakoł hetaj temy jon nazvaŭ niapravilnaj, a ton lista acharaktaryzavaŭ jak niedapuščalny, bo jon, maŭlaŭ, utrymlivaje «chamskija elemienty».

Naprykancy Pucin zaklikaŭ Zialenskaha nie bajacca ŭdzielničać u vybarach i, źviartajučysia da rasijskich vajskoŭcaŭ, skazaŭ: «Rabotajtie, braťja».

Kamientary da artykuła