Najlepšaha futbolnaha arbitra Afryki nie puścili ŭ ZŠA na čempijanat śvietu. Padviało hramadzianstva

Za niekalki dzion da startu čempijanatu śvietu pa futbole ŭ ZŠA ŭźnik vizavy skandał. Amierykanskaja imihracyjnaja słužba admoviła va ŭjeździe samalijskamu arbitru Amaru Artanu, jaki byŭ uklučany FIFA ŭ śpis sudździaŭ turniru.

Amar Artan

Jak paviedamlajecca, Artan prybyŭ u mižnarodny aeraport Majami z dypłamatyčnym pašpartam, adnak jamu admovili va ŭjeździe biez tłumačeńnia pryčyn i adpravili zvarotnym rejsam u Stambuł.

Artan staŭ pieršym u historyi arbitram z Samali, jaki atrymaŭ pryznačeńnie na finalnuju stadyju čempijanatu śvietu. U 2025 hodzie jon byŭ pryznany najlepšym arbitram Afryki pavodle viersii Afrykanskaj kanfiederacyi futboła (CAF) i sudziŭ finalny matč afrykanskaj Lihi čempijonaŭ pamiž kłubami «Piramids» ź Jehipta i «Mamiełodzi Sandaŭnz» z PAR.

Samali ŭvachodzić u pieralik krain, hramadzianie jakich traplajuć pad amierykanskija vizavyja abmiežavańni. Niahledziačy na najaŭnaść dypłamatyčnaha pašparta, vyklučeńnie dla Artana, jak paviedamlajecca, zroblena nie było.

Raniej z padobnymi ciažkaściami sutyknułasia zbornaja Iraka. Jaje napadnik Ajmien Chusiejn paśla prybyćcia ŭ Čykaha byŭ zatrymany dla dadatkovaj pravierki. Pavodle źviestak pradstaŭnikoŭ kamandy, dopyt doŭžyŭsia kala siami hadzin, paśla čaho futbalistu ŭsio ž taki dazvolili ŭjezd.

U toj ža čas fatohrafu irakskaj zbornaj pašancavała mienš: paśla bolš čym dziesiaci hadzin pravierki jamu admovili va ŭjeździe i vysłali z krainy.

Prablemy z atrymańniem amierykanskich viz uźnikli i ŭ šerahu pradstaŭnikoŭ futbolnaj zbornaj Irana, u tym liku ŭ kiraŭnictva nacyjanalnaj fiederacyi.

Čempijanat śvietu pa futbole 2026 hoda startuje 11 červienia ŭ ZŠA, Kanadzie i Mieksicy. Upieršyniu ŭ historyi jon pravodzicca adrazu ŭ troch krainach, i ŭ im znoŭ ža ŭpieršyniu ŭdzielničajuć ažno 48 zbornych.

Kamientary da artykuła