Vykładčycu vakału z Hatava asudzili za palityku

25‑hadovaja Śviatłana Karalova — vakalistka i vykładčyca, umieje hrać na čatyroch muzyčnych instrumientach.

Śviatłana Karalova padčas tancaŭ na Kupalle ŭ Minsku, 7 lipienia 2023. Fota: Stringer/Anadolu Agency via Getty Images

Śviatłanie Karalovaj 25 hadoŭ. Jana z Hatava pad Minskam. Advučyłasia ŭ Minskim dziaržaŭnym kaledžy mastactvaŭ, a paśla — u Biełaruskim dziaržaŭnym univiersitecie kultury i mastactvaŭ. Univiersitet jana skončyła ŭ 2020 hodzie.

Dziaŭčyna źviazała svajo žyćcio z muzykaj: jana pracavała nastaŭnicaj pa kłasie vakału ŭ muzyčnaj studyi «Art-kvartał», dzie vykładała bolš za try hady. Śviatłana ŭmieje hrać na čatyroch muzyčnych instrumientach i vučycca hrać na piatym.

Śviatłana była artystkaj art-folk-hurta. U składzie kalektyvu vystupała na roznych mierapryjemstvach: na vystavie «Biełahra-2021», śviacie Kupalla ŭ Minsku ŭ 2023 hodzie, na kancercie da 9 Maja ŭ Pałacy Respubliki ŭ 2024-m.

Śviatłana Karalova. Fota: art-kvartal.by

Karalova cikaviłasia fihurnym katańniem, fotamastactvam dy tancami.

Nieviadoma, pry jakich mienavita abstavinach Śviatłanu zatrymali siłaviki. Jaje sudzili ŭ hetym hodzie ŭ Minskim abłasnym sudzie pavodle častak 1 i 2 artykuła 361‑4 Kryminalnaha kodeksa Biełarusi («sadziejničańnie ekstremisckaj dziejnaści»).

Dziaŭčynie prysudzili chatniuju chimiju.

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj.

Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ pra zakryćcio prajekta. 

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu. 

Kamientary da artykuła