Stali viadomyja novyja fakty pra kalinoŭca Siarhiejeva, jaki trapiŭ u łukašenkaŭskuju turmu

Pravaabaroncam z Mayday Team stali viadomyja novyja padrabiaznaści pra Andreja Siarhiejeva z pazyŭnym «Kot», jakoha raniej pakazali ŭ siužecie telekanała ANT siarod zatrymanych biełarusaŭ, što vajavali na baku Ukrainy.

Andrej Siarhiejeŭ. Skrynšot siužeta ANT

Viadoma, što Siarhiejeŭ jašče ŭ savieckija časy skončyŭ Kazanskaje tankavaje vučylišča. Paśla ŭdziełu ŭ pratestach 2020 hoda jon razam ź siamjoj vyjechaŭ ź Biełarusi. Pavodle infarmacyi prapahandystaŭ, u Polščy jon dałučyŭsia da Pałka Kalinoŭskaha. Paśla vychadu siužeta jaho były pabracim Alaksandr Kłačko paviedamiŭ, što mužčyna mieŭ surjoznyja prablemy sa zdaroŭjem.

Pavodle źviestak Mayday Team, Andreja Siarhiejeva zatrymali ŭ žniŭni 2025 hoda na pamiežnym punkcie ŭ Breście, kali jon vyjazdžaŭ ź Biełarusi ŭ Polšču, dzie pracavaŭ kiroŭcam-dalnabojščykam. Paśla zatrymańnia suprać jaho raspačali kryminalnuju spravu i źmiaścili ŭ śledčy izalatar u Kaladzičach.

Prykładna ŭ lutym 2026 hoda śledstva było zavieršana, a spravu pieradali ŭ sud. Krynica pravaabaroncaŭ śćviardžaje, što Siarhiejeva abvinavacili va ŭdziele ŭ bajavych dziejańniach na terytoryi zamiežnaj dziaržavy, a taksama niejkim čynam źviazali z tak zvanaj «spravaj Hajuna».

Pavodle surazmoŭcy Mayday Team, mužčyna bajaŭsia atrymać nastolki vialiki termin źniavoleńnia, što moh nie vyjści z kałonii žyvym. Kolki hadoŭ pazbaŭleńnia voli jamu ŭ vyniku pryznačyli, pakul nieviadoma.

Kamientary da artykuła